Futbol bo‘yicha O‘zbekiston terma jamoasi JCH—2026 3-saralashi 1-turida Shimoliy Koreyaga qarshi bahs olib bordi.
Uchrashuv O‘zbekiston terma jamoasining 1:0 hisobidagi g‘alabasi bilan yakunlandi. O‘yindan so‘ng bosh murabbiy Srechko Katanes ishtirokida matbuot anjumani o‘tkazildi.
Bugun qiyin o‘tgan bahsda g‘alaba qozondik. O‘z imkoniyatimizni to‘liq namoyish eta olmadik, lekin muhimi g‘alaba qozondik. Birinchi bo‘limda ko‘proq gol kiritsak bo‘lardi, sababi ko‘p vaziyatlar yarata oldik. Penalti ham o‘z xatolarimiz ortidan yuzaga keldi.
Raqib bizdan ko‘ra ko‘proq yig‘in o‘tkazgan holda bugungi o‘yinga yetib keldi. Shu sababli ular jismoniy tomondan yaxshi harakat qila olishdi, deb o‘ylayman.
Aytganimdek, bugun yetarlicha imkoniyatga ega bo‘ldik. Muammo asosan jismoniy holatda bo‘ldi. Bizning asosiy maqsadimiz kerakli natijalarni qo‘lga kiritish va bugun buni uddaladik. Oldimizda Qirg‘izistonga qarshi yana bir muhim o‘yin kutib turibdi. Guruhdagi boshqa raqiblar xususida gapirishga hali erta.
Shuningdek, uchrashuvdagi yagona gol muallifiga aylangan Jaloliddin Masharipov ham o‘z fikrlari bilan o‘rtoqlashdi.
Barchani bugungi g‘alaba bilan tabriklayman. Kerakli natijani qo‘lga kiritdik. Bu bosqich biz uchun har doim oson bo‘lmagan, chunki uning o‘ziga yarasha bosimi bor. Keyingi o‘yinlarda chiroyli g‘alaba qozonib, xalqimizni Xursand qilishga harakat qilamiz.
O‘z o‘yinimizni to‘liq ko‘rsata oldik, deya olmayman. Sababi ozroq hayajon bo‘ldi, JChga yaqinlashganingiz sari bosim va hayajon bo‘lishi tabiiy. Biroq shu kabi muhim o‘yinlar bilan Jahon chempionatiga yo‘l olinadi, deb o‘ylayman.
Bu bosqichda kuchsiz raqib yo‘q. Psixologik tayyorgarlik ko‘p narsani hal qiladi. Bosh murabbiyimiz ham hech qaysi o‘yin oson bo‘lmasligini uqtirib kelmoqdai. Keyingi o‘yinlarda yanada yorqinroq o‘yin ko‘rsatishga harakat qilamiz.
O‘zbekiston 2-tur bahsini Qirg‘izistonga qarshi o‘tkazadi. Safardagi uchrashuv 10-sentyabr kuniga belgilangan.
Izoh (0)