Германия ғарбидаги Зиген шаҳрида аёл киши автобусда йўловчиларга пичоқ билан ҳужум қилиши оқибатида камида беш киши жароҳатланди. Бу ҳақда Bild нашри ёзмоқда.
Нашрнинг ёзишича, воқеа маҳаллий вақт билан 19:40 атрофида содир бўлган. Уч кишининг аҳволи оғир экани хабар қилиняпти.
Барча ярадорлар шифохоналарга етказилган. Полиция маълумотларига кўра, автобус Зиген шаҳрида ташкил этилган фестивалга кетаётган эди. Жиноят содир бўлган вақтда автобусда камида 40 нафар йўловчи бўлган. Ҳуқуқ-тартибот идоралари ходимлари бу воқеани теракт сифатида баҳоламади.
![](/static/2024/08/31/zigen-gjLwhab_.jpg)
Воқеа жойига полиция ходимлари етиб келиб, аёлни ҳибсга олган.
Bild нашрининг ёзишича, аёл 32 ёшда. У немис бўлиб, руҳий касал ва гиёҳванд моддалар таъсирида бўлиши мумкин. Гувоҳлар сўроқ қилинмоқда. Автобус йўловчиларига психологик ёрдам кўрсатилмоқда.
24 август куни Германиянинг Золинген шаҳридаги фестивалда номаълум эркак пичоқ билан одамларга ҳужум қилганди. Ҳужум маҳаллий вақт билан тахминан 21:45 да Золингеннинг 650 йиллигига бағишланган фестивалда содир бўлган. Дастлабки маълумотларга кўра, номаълум эркак дуч келган одамга ташланиб, уни пичоқлашга уринган.
Кейин жиноятчи воқеа жойидан қочиб кетишга муваффақ бўлган.
Изоҳ (0)