YPX xodimi shaxsiy avtomobilda mahalla ichida yuqori tezlikda harakatlandi. IIB holatni qonuniy deb baholadi

Farg‘ona viloyati Marg‘ilon shahridagi Mash’al ko‘chasida YPX xodimi shaxsiy avtomashinasida Nexia’ni katta tezlikda quvib o‘tdi. Yo‘l chetida o‘ynab yurgan bolalar chetga qochib qolishga ulgurdi. “Daryo” nashriga kelib tushgan murojaatda kuzatuv kamerasidan olingan video ham taqdim etilgan.

Holat yuzasidan viloyat IIB axborot xizmati boshlig‘i Ismoil Sharipov “Daryo”ga izoh berdi. Unga ko‘ra, 26-avgust kuni Marg‘ilon shahrida xizmat olib borayotgan YPX inspektori oldidan harakatlanib o‘tgan davlat raqam belgisi 40 D 043 FA bo‘lgan Nexia rusumli avtomobil shubhali ko‘ringani uchun planshet yordamida tekshirgan vaqtida ushbu davlat raqam belgisi boshqa avtomobilga tegishli ekani ma’lum bo‘lgan.

Shundan so‘ng, haydovchi radioaloqa vositasi orqali ushbu transport vositasini to‘xtatish haqidagi xabarni olgan YPX inspektorlarining qonuniy talabini bajarmasdan harakatlanishda davom etgan. Bu esa YPX inspektorlari shubhasini yanada oshirgan va ortidan kuzatib borilgan.

Qonunchilikka ko‘ra, ichki ishlar xodimi huquqbuzarlikni bartaraf etish uchun barcha chora-tadbirlarni ishga solishi ko‘rsatib o‘tilgan. Bu vaziyatda xodim huquqbuzarlikni bartaraf etish uchun o‘zidagi mavjud imkoniyatdan foydalangan. Agar o‘sha xodimning xatti-harakatida noqonuniy holat kuzatilganida, unga, albatta, chora ko‘rilgan bo‘lar edi, dedi viloyat IIB axborot xizmati boshlig‘i.

Vazirlar Mahkamasi qarori bilan tasdiqlangan nizomga muvofiq, yo‘l-patrul xizmati xodimi o‘zining shaxsiy xavfsizligi va harakat qatnashchilari xavfsizligini ta’minlash uchun ta’qib qilish yoki kuzatish vaqtida quyidagilarga amal qilishi lozimligi ko‘rsatib o‘tilgan:

• patrul avtomobilida maxsus chiroq-mayoqcha va tovushli signallar muntazam yoqilgan holatda bo‘lishi;
• aniq shart-sharoitlardan kelib chiqqan holda harakat tezligini tanlashi;
• saf bo‘lim (bo‘linma) yoki IIB navbatchisiga o‘zining ketayotgan joyi, qayerdaligi va harakatning yo‘nalishi to‘g‘risida ma’lum qilib turishi;
• yo‘l harakatining boshqa qatnashchilarini hushyorlik va ehtiyotkorlik choralarini ko‘rishlari bo‘yicha xabardor qilib borishi;
• ta’qib qilish va kuzatish jarayonida transport vositasining harakatlanishini cheklash choralarini ko‘rishi.
• YPX xodimi ta’qib qilish yoki kuzatish vaqtida yo‘l harakati qatnashchilarining hayoti va sog‘lig‘i uchun xavfli harakatlar sodir etmasligi lozim.