ЙПХ ходими шахсий автомобилда маҳалла ичида юқори тезликда ҳаракатланди. ИИБ ҳолатни қонуний деб баҳолади

Фарғона вилояти Марғилон шаҳридаги Машъал кўчасида ЙПХ ходими шахсий автомашинасида Nexia’ни катта тезликда қувиб ўтди. Йўл четида ўйнаб юрган болалар четга қочиб қолишга улгурди. “Дарё” нашрига келиб тушган мурожаатда кузатув камерасидан олинган видео ҳам тақдим этилган.

Ҳолат юзасидан вилоят ИИБ ахборот хизмати бошлиғи Исмоил Шарипов “Дарё”га изоҳ берди. Унга кўра, 26 август куни Марғилон шаҳрида хизмат олиб бораётган ЙПХ инспектори олдидан ҳаракатланиб ўтган давлат рақам белгиси 40 D 043 FА бўлган Nexia русумли автомобиль шубҳали кўрингани учун планшет ёрдамида текширган вақтида ушбу давлат рақам белгиси бошқа автомобилга тегишли экани маълум бўлган.

Шундан сўнг, ҳайдовчи радиоалоқа воситаси орқали ушбу транспорт воситасини тўхтатиш ҳақидаги хабарни олган ЙПХ инспекторларининг қонуний талабини бажармасдан ҳаракатланишда давом этган. Бу эса ЙПХ инспекторлари шубҳасини янада оширган ва ортидан кузатиб борилган.

Қонунчиликка кўра, ички ишлар ходими ҳуқуқбузарликни бартараф этиш учун барча чора-тадбирларни ишга солиши кўрсатиб ўтилган. Бу вазиятда ходим ҳуқуқбузарликни бартараф этиш учун ўзидаги мавжуд имкониятдан фойдаланган. Агар ўша ходимнинг хатти-ҳаракатида ноқонуний ҳолат кузатилганида, унга, албатта, чора кўрилган бўлар эди, деди вилоят ИИБ ахборот хизмати бошлиғи.

Вазирлар Маҳкамаси қарори билан тасдиқланган низомга мувофиқ, йўл-патрул хизмати ходими ўзининг шахсий хавфсизлиги ва ҳаракат қатнашчилари хавфсизлигини таъминлаш учун таъқиб қилиш ёки кузатиш вақтида қуйидагиларга амал қилиши лозимлиги кўрсатиб ўтилган:

• патрул автомобилида махсус чироқ майоқча ва товушли сигналлар мунтазам ёқилган ҳолатда бўлиши;
• аниқ шарт-шароитлардан келиб чиққан ҳолда ҳаракат тезлигини танлаши;
• саф бўлим (бўлинма) ёки ИИБ навбатчисига ўзининг кетаётган жойи, қаердалиги ва ҳаракатнинг йўналиши тўғрисида маълум қилиб туриши;
• йўл ҳаракатининг бошқа қатнашчиларини ҳушёрлик ва эҳтиёткорлик чораларини кўришлари бўйича хабардор қилиб бориши;
• таъқиб қилиш ва кузатиш жараёнида транспорт воситасининг ҳаракатланишини чеклаш чораларини кўриши.
• ЙПХ ходими таъқиб қилиш ёки кузатиш вақтида йўл ҳаракати қатнашчиларининг ҳаёти ва соғлиғи учун хавфли ҳаракатлар содир этмаслиги лозим.