O‘zbekiston tashqi ishlar vaziri Baxtiyor Saidov bugun BMT Aholishunoslik jamg‘armasi (UNFPA)ning O‘zbekistondagi doimiy vakili Nigina Abaszadeni qabul qildi.
Bu haqida vazir o‘zining Telegram kanalida xabar berdi.
“BMT Aholishunoslik jamg‘armasining (UNFPA) O‘zbekistondagi doimiy vakili, doktor Nigina Abaszade xonim bilan samarali uchrashuv o‘tkazdik.
O‘zbekiston hukumati onalar salomatligini yaxshilash, aholi o‘sishi, yoshlar salohiyatini oshirish, gender tengligi va boshqa ko‘plab yo‘nalishlarda eng yaxshi shart-sharoitlarni yaratish maqsadida xalqaro tashkilotlar bilan faol hamkorlik qilmoqda.
Biz 30 yildan ziyod vaqt davomida mamlakatimizda faoliyat yuritib kelayotgan UNFPA jamoasi tomonidan olib borilayotgan barcha muhim ishlarni qadrlaymiz”,— deb yozdi Baxtiyor Saidov.
Avvalroq BMT aholishunoslik jamg‘armasining (UNFPA) vakolatxonasi O‘zbekistonda 2017-yildan keyin tug‘ilish o‘sishining asosiy omillari nima ekani haqida “Daryo”ga maʼlum qilgandi.
Unga ko‘ra, bolali oilalar moddiy ahvolining yaxshilanishi hamda odamlarning ertangi kunga ishonchi darajasining umumiy o‘sishi bunga asosiy omil ekani qayd etilgan.
Izoh (0)