Issiqlik elektr stansiyalari qishki mavsumga tayyormi?

Issiqlik elektr stansiyalari va issiqlik markazlarini qishki mavsumga tayyorlash, energoobyektlarning barqaror faoliyatini ta’minlash, import o‘rnini bosuvchi mahsulotlarni mahalliy sharoitlarda ishlab chiqarishni joriy etishga oid yirik loyihalar amalga oshirilmoqda. Bu haqida Energetika vazirligi xabar berdi.

Joriy kuz-qish mavsumiga tayyorgarlik doirasida “O‘zbekenergota’mir” AJ issiqlik elektr stansiyalaridagi 53 ta energoqurilmani mavsumga hozirlash maqsadida mukammal, o‘rta va joriy ta’mirlash ishlarini bosqichma-bosqich olib bormoqda.

 

Jumladan, mamlakatimiz energetika tizimida yirik elektr stansiyalar hisoblanuvchi Toshkent va Navoiy issiqlik elektr stansiyalarida ham bu borada yirik loyihalar amalga oshirilmoqda.

Bu yerda zamonaviy energoqurilmalar qatorida an’anaviy energobloklarni modernizatsiya qilish, ularni raqamlashtirish va ishlab chiqarishda yoqilg‘i sarfini kamaytirish bo‘yicha ishlar yakuniga yetkazildi.

Toshkent issiqlik elektr stansiyasining 9-son energoblokida mukammal ta’mirlash ishlari yakunlandi. Xususan, ta’mir ishlari davomida energoblokning qozon qurilmasi, turbinaning yuqori va past bosim rotorlari ishchi kuraklari, generator hamda transformatorlarida ishlar olib borildi.

Ushbu ishlarni sifatli va o‘z muddatida amalga oshirish maqsadida 200 nafarga yaqin malakali mutaxassis jalb etildi. Remont kampaniyasining samarali tashkil etilishi natijasida ushbu energoblokning ishlab chiqarish quvvati 140 MVtdan 150 MVtga yetkazildi.

Tizimning raqamlashtirilishi orqali yoqilg‘i sarfi kamayishiga, natijada mahsulot tannarxi pasayishiga erishildi. Bu esa yiliga 458,6 ming kub metr tabiiy gaz iqtisod qilinishi imkonini beradi. Atmosfera havosiga ifloslantiruvchi moddalarning tashlamalari miqdori 108,4 tonnaga kamaytiriladi.

Navoiy issiqlik elektr stansiyasida esa 3-sonli energoblokda mukammal ta’mirlash ishlari amalga oshirildi.

Ta’mirlash davrida qozon va turbina agregatlarida texnik chora-tadbirlar amalga oshirildi. Ushbu ishlarga jami 300 nafar ishchi-xodim jalb etildi. Ta’mirlash ishlarini bajarish natijasida qurilmalarning texnik iqtisodiy ko‘rsatkichlari yaxshilanib, ishonchli ishlash darajasi oshirildi.

“Xususan, o‘rnatilgan quvvati 150 MVt bo‘lgan 3-energoblok ta’mirlanishi natijasida yil yakuniga qadar 5 mln kub metr tabiiy gaz iqtisod qilinadi.

Energetika tarmog‘ining asosiy generatsiya quvvatlari bo‘lgan issiqlik elektr stansiyalarida modernizatsiya, ta’mirlash va ekspluatatsiya ishlari davom etmoqda”, deyiladi xabarda.