Toshkentdagi Bobur bog‘ida 12-iyul kuni O‘zbekiston Xotin-qizlar qo‘mitasi Birlashgan Millatlar Tashkilotining aholishunoslik jamg‘armasi (YuNFPA) bilan hamkorlikda o‘smir qizlar kelajagiga investitsiya kiritish bo‘yicha global va milliy sa’y-harakatlar sharafiga Jahon aholishunoslik kunini nishonladi. Bu haqda BMTning aholishunoslik jamg‘armasi matbuot xizmati “Daryo”ga ma’lum qildi.
Jahon aholishunoslik kunining bu yilgi mavzusi “O‘smir qizlar uchun investitsiyalar” deb ataldi. Uning maqsadi esa yoshlar, xususan o‘smir qizlar salomatligini asrash va ta’lim olishi uchun investitsiya kiritish, shuningdek, ularga o‘z salohiyatini to‘liq ro‘yobga chiqarish uchun imkoniyatlar berish zarurligini ta’kidlashdan iborat bo‘ldi.
O‘zbekistonda YuNFPA Xotin-qizlar qo‘mitasi va Toshkent shahri hamda Yakkasaroy tumani hokimliklari bilan hamkorlikda poytaxtning Bobur nomli bog‘ida ochiq havoda Jahon aholishunoslik kuni munosabati bilan bayramona tadbir uyushtirildi. Xotin-qizlar o‘rtasida marafon, asfaltga bo‘r bilan chizilgan bolalar rasmlari tanlovi, shashka turniri va ijodiy ansambllar chiqishlari tadbir dasturidan joy oldi. Musobaqa g‘oliblari va ishtirokchilariga tashkilotchilarning sovg‘alari taqdim etildi.
Jahon aholishunoslik kuni 11-iyulda nishonlanadi. Bu kunni nishonlash 1987-yil 11-iyuldan boshlab an’anaga aylangan.
Izoh (0)