Raqobat qo‘mitasi AVO Bank AJni jarimaga tortdi. Bu haqda qo‘mita matbuot xizmati xabar berdi.
Maʼlum qilinishicha, qo‘mitaga AVO Bank AJ ko‘rsatayotgan xizmatlari haqida noto‘g‘ri reklama tarqatayotgani yuzasidan murojaat kelib tushgan.
Murojaatda bank saytining “AVO bonuslari” sahifasidagi reklama axborotlarida “250 000 so‘m har bir yangi mijozga”, “+250 000 so‘m sizga va Avoning har bir yangi mijoziga”, “Hisobingizga 250 000 so‘m olish” va “Kartaga 250 000 so‘m olish” kabi maʼlumotlar ko‘rsatilgani aytilgan.
Murojaatda bank tomonidan har bir yangi mijozga 250 000 so‘m pul berilmasligi, mazkur pul ko‘rinishidagi bonuslarni olish uchun bank mijozi maʼlum bir harakatlarni amalga oshirishi lozimligi, shunda ham mijozga 250 000 so‘m pul mablag‘i naqd pul ko‘rinishida taqdim etilmasdan, bankning mobil ilovasi orqali bonus ballari ko‘rinishida taqdim etilishi maʼlum qilingan.
Holat yuzasidan olib borilgan o‘rganish natijasida AVO Bank AJning saytida “AVO O‘zbekistondagi eng qulay mobil bank” mazmunidagi reklama joylashtirilgani aniqlangan.
Shuningdek, bank tomonidan har bir yangi mijoz uchun 1 bonus bali 1 so‘mga teng bo‘lgan bonus ballari taqdim etilishi, mijozning o‘z xohishiga ko‘ra ushbu bonuslarni pul mablag‘lariga almashtirishi yoki bankning ko‘rsatgan xizmatlari uchun to‘lov sifatida ishlatishi mumkinligi belgilangani, shu sababdan reklama axborotlarida “Har bir yangi mijoz uchun 250 000 so‘m oling”, “Har bir taklif qilingan shaxs uchun 50 000 so‘m”, “Hisob raqamiga 250 000 so‘m oling” mazmunidagi iboralardan foydalanilgani, biroq AVO Bank AJning ushbu pul mablag‘larini mijozlarning hisobraqamlariga to‘g‘ridan to‘g‘ri o‘tkazib berish imkoni mavjud emasligi aniqlandi, deyiladi xabarda.
Shu bilan birga, AVO Bank AJ tomonidan ko‘rsatilayotgan xizmatlar to‘g‘risida ommaviy axborot vositalari va tashqi reklama vositalarida tarqatilgan reklama axborotlari qo‘shimcha ravishda o‘rganilganda bir qator kamchiliklar aniqlandi.
Jumladan, turli manbalar orqali eʼlon qilingan reklama axborotlarida AVO Bank AJning “AVO Platinum” kredit kartasi haqida joylashtirilgan maʼlumotlarida “AVO platinum kredit kartasi — har qanday xarid uchun 0% stavka” hamda “AVO platinum kredit kartasi — 2 millionga xarid qilib, 2 million qaytarish” degan mazmundagi iboralardan foydalanilgani kuzatildi.
Vaholanki, AVO Bank AJning “AVO Platinum” kredit kartasi mablag‘laridan foydalanish shartlariga ko‘ra, mijozlarning ushbu kredit kartalari orqali amalga oshirgan xarid summalari uchun 45 kun davomida foizlar hisoblanmasligi, xarid amalga oshirilgan sanadan 45 kun o‘tgach, ushbu pul mablag‘lari uchun belgilangan tartibda kredit foizlari hisoblanishi maʼlum bo‘ldi, deya qo‘shimcha qilinadi xabarda.
Ushbu holatlar inobatga olinib, AVO Bank AJga nisbatan reklama va isteʼmolchilar huquqlarini himoya qilish to‘g‘risidagi qonunchilik talablari buzilgani natijasida belgilangan tartibda moliyaviy jarima qo‘llash yuzasidan qaror qabul qilindi.
Izoh (0)