Hind san’atining ajoyib namunasi — Sonam Kapurning Mumbaydagi uyiga sayohat

Sonam Kapur hali ham Bollivudning eng sevimli aktrisalaridan biri. Yosh bo‘lishiga qaramay, hind merosi haqida qayg‘urib yuradigan Kapur Mumbaydagi uyining interyerini milliy an’analarga bag‘ishlagan.

“Turmush o‘rtog‘im Anand va kichik o‘g‘lim Vaya bilan birga yashaydigan bu uy menga ayol, kolleksioner va ona sifatida yangi hayot taqdim etdi, — deb gap boshlaydi u. — Men anchadan beri Hindistonning chekka burchaklarida syomka jarayonlarida to‘plagan barcha narsalarimni saqlaydigan xona haqida orzu qilardim”.

“Agar menga nimadir yoqib qolsa, uni uyga olib kelishimga hech narsa xalaqit bermaydi”, deydi u Lakshmiy Nivas saroyida suratga olish paytida olib kelgan ulkan durri (qo‘lda to‘qilgan tuksiz gilam)ni olib ketish bilan bog‘liq sarguzashti bilan baham ko‘rar ekan. Hozirda uyning kirish dahliziga to‘shalgan bu gilam Pyer Frey gulqog‘ozlari va qadimgi Xitoy gravyuralar bilan uyg‘unlik hosil qilgan.

Karantinda Notting-Hillda yashagandan so‘ng, u ko‘proq vaqtini o‘zi tug‘ilgan shaharda o‘tkazishga qaror qiladi. Sonam Kapur qadimiy binolarning taniqli ishqibozi bo‘lib, avvaliga unga ko‘chib o‘tish g‘oyasi umuman yoqmaydi. “Ammo unda ko‘proq vaqt o‘tkazganim sari bularning barchasiga bo‘lgan munosabatim o‘zgara boshladi”, deydi u.

Kapur mashhur dizayner xolasiga ushbu loyihada hamkorlik qilishni taklif qiladi. Dizaynerning so‘zlariga ko‘ra, ikki ayol bor vaqtini “jiyani uzoq vaqt orzu qilgan hind san’atiga hurmat-ehtirom tuhfasi”ga aylantirishga bag‘ishlaydi. Jaypurlik mashhur freskachi rassom Vikas Sonining qo‘lda devorlarga naqsh chizish uchun taklif qilinishi ajoyib makon yaratishdagi birinchi qadam edi.

“U mashhur bo‘lishidan ancha oldin xolam bilan birga ishlagan; u oilamizning do‘sti”, — deydi Kapur. — Vikas sovg‘a sifatida bolalar xonasiga rasm chizganida hayratda qoldim: ko‘z o‘nimda Hindistonning g‘aroyib changalzorlari paydo bo‘ldi”.

“Bilaman, ba’zi tengdoshlarim didimni haddan tashqari g‘alati deb hisoblashadi, — deydi u, — lekin interyer yaratishda ikki tomonlama yondashdim: birinchidan, hind dekorativ san’atining elchisi bo‘lishni xohlardim, ikkinchidan, o‘zim katta bo‘lgan joylarga yangicha qarashni istardim”.

Yil davomida xola va jiyan 697 kvadrat metr maydonda bir necha avlod yashagan uy interyerini yaratish uchun mashaqqatli ishlarni amalga oshirdi. “Men Hindiston hunarmandchiligiga ishqiboz ayollarning to‘rtinchi avlodiman; bu uy bizning shaxsiy makonimiz. Bu uyning ortida har bir ip, plitka ustida ishlagan va bu makonni shu qadar go‘zal qilgan ko‘pchilik tanimaydigan hunarmandlar bor. Men bu muhabbat qasidasini aynan ularga bag‘ishlayman”, deydi Sonam.