Ҳинд санъатининг ажойиб намунаси — Сонам Капурнинг Мумбайдаги уйига саёҳат

Сонам Капур ҳали ҳам Болливуднинг энг севимли актрисаларидан бири. Ёш бўлишига қарамай, ҳинд мероси ҳақида қайғуриб юрадиган Капур Мумбайдаги уйининг интерерини миллий анъаналарга бағишлаган.

“Турмуш ўртоғим Ананд ва кичик ўғлим Вая билан бирга яшайдиган бу уй менга аёл, коллексионер ва она сифатида янги ҳаёт тақдим этди, — деб гап бошлайди у. — Мен анчадан бери Ҳиндистоннинг чекка бурчакларида сёмка жараёнларида тўплаган барча нарсаларимни сақлайдиган хона ҳақида орзу қилардим”.

“Агар менга нимадир ёқиб қолса, уни уйга олиб келишимга ҳеч нарса халақит бермайди”, дейди у Лакшмий Нивас саройида суратга олиш пайтида олиб келган улкан дурри (қўлда тўқилган туксиз гилам)ни олиб кетиш билан боғлиқ саргузашти билан баҳам кўрар экан. Ҳозирда уйнинг кириш даҳлизига тўшалган бу гилам Пьер Фрей гулқоғозлари ва қадимги Хитой гравюралар билан уйғунлик ҳосил қилган.

Карантинда Ноттинг-Ҳиллда яшагандан сўнг, у кўпроқ вақтини ўзи туғилган шаҳарда ўтказишга қарор қилади. Сонам Капур қадимий биноларнинг таниқли ишқибози бўлиб, аввалига унга кўчиб ўтиш ғояси умуман ёқмайди. “Аммо унда кўпроқ вақт ўтказганим сари буларнинг барчасига бўлган муносабатим ўзгара бошлади”, дейди у.

Капур машҳур дизайнер холасига ушбу лойиҳада ҳамкорлик қилишни таклиф қилади. Дизайнернинг сўзларига кўра, икки аёл бор вақтини “жияни узоқ вақт орзу қилган ҳинд санъатига ҳурмат-эҳтиром туҳфаси”га айлантиришга бағишлайди. Жайпурлик машҳур фрескачи рассом Викас Сонининг қўлда деворларга нақш чизиш учун таклиф қилиниши ажойиб макон яратишдаги биринчи қадам эди.

“У машҳур бўлишидан анча олдин холам билан бирга ишлаган; у оиламизнинг дўсти”, — дейди Капур. — Викас совға сифатида болалар хонасига расм чизганида ҳайратда қолдим: кўз ўнимда Ҳиндистоннинг ғаройиб чангалзорлари пайдо бўлди”.

“Биламан, баъзи тенгдошларим дидимни ҳаддан ташқари ғалати деб ҳисоблашади, — дейди у, — лекин интерер яратишда икки томонлама ёндашдим: биринчидан, ҳинд декоратив санъатининг элчиси бўлишни хоҳлардим, иккинчидан, ўзим катта бўлган жойларга янгича қарашни истардим”.

Йил давомида хола ва жиян 697 квадрат метр майдонда бир неча авлод яшаган уй интерерини яратиш учун машаққатли ишларни амалга оширди. “Мен Ҳиндистон ҳунармандчилигига ишқибоз аёлларнинг тўртинчи авлодиман; бу уй бизнинг шахсий маконимиз. Бу уйнинг ортида ҳар бир ип, плитка устида ишлаган ва бу маконни шу қадар гўзал қилган кўпчилик танимайдиган ҳунармандлар бор. Мен бу муҳаббат қасидасини айнан уларга бағишлайман”, дейди Сонам.