Belarus prezidenti Aleksandr Lukashenkoning bayonoti ortidan Qozog‘iston Tashqi ishlar vazirligi mamlakatdagi Belarus elchisini chaqirtirdi. Bu haqda vazirlik saytida xabar berildi.
Lukashenko ayrim sobiq sovet davlatlarini Rossiyaga nisbatan xudbinlikda ayblab, ular Rossiyaga hech narsa taklif qilmasdan, undan foyda olishga intilayotganini aytgandi. Belarus prezidenti Qozog‘istondagi yanvar voqealarini eslab, respublika Xitoy, Hindiston yoki Pokistonga emas, Moskva va Minskka murojaat qilganini aytgan.
“Rossiyadan yordam so‘rashingiz kerak bo‘lgan payt yaqinlashmoqda. Qozog‘istonda bo‘lgani kabi inqiroz yuz berganda, hamma Putindan yordam so‘raydi. Biz (KXSHT) tezkorlik bilan harakat qilib, u yerga kuchlarni jo‘natdik va tartibsizliklarni bartaraf etdik”, degan edi Lukashenko.
Qozog‘iston TIV mazkur bayonot ortidan Belarus elchisi Pavel Utyupinni chaqirtirdi. Tashqi ishlar vaziri Murat Nurtleu elchi bilan suhbatda Belarus ”joriy jarayonlarga nisbatan” Qozog‘iston pozitsiyasini xolisona baholashi kerakligini aytdi.
“Belarus elchisi Pavel Utyupin bilan ikki tomonlama darajada ham, ko‘p tomonlama tashkilotlar doirasida ham Qozog‘iston-Belarus hamkorligining dolzarb masalalari muhokama etildi. Xususan, vazir Qozog‘iston BMT ustavi va xalqaro huquqning asosiy me’yorlariga muvofiq muvozanatli va tinchlikparvar tashqi siyosat olib borayotganini ta’kidladi.
Mamlakatimiz davlatlar o‘rtasidagi barcha kelishmovchiliklar siyosiy-diplomatik vositalar orqali hal etilishi kerakligiga qat’iy ishonch bildirdi. Hozirgi geosiyosiy vaziyatda davlat rahbari tomonidan ishlab chiqilgan mamlakatning tashqi siyosati kursi o‘z samaradorligini isbotladi”, deyiladi Qozog‘iston TIV bayonotida.
Izoh (1)
Shunchaki izoh yozish protsesi bn tanishdim