Belarus prezidenti Aleksandr Lukashenko ba’zi sobiq sovet davlatlari Rossiyaga hech narsa taklif qilmasdan, undan foyda olishga intilayotgani haqida fikr bildirdi. U bu haqda “Rossiya” telekanaliga bergan intervyusida ma’lum qilgan.
![](/static/2024/08/21/photo_2024-08-21_10-25-39-EdAnBeqO.jpg)
Biz Rossiya bilan aslida bir qayiqdamiz. Agar u ag‘darilib ketsa, biz ham birga cho‘kib ketamiz. Ittifoqchilik munosabatlarimizni yashirishning hojati yo‘q. Biz o‘zimizni Rossiyaga hech narsa bermay, undan faqat olishni istaydigan ba’zi boshqa davlatlar kabi tutmaymiz”, dedi Lukashenko.
Belarus prezidenti bunday holat uzoq davom etolmasligini ta’kidladi.
“Rossiyadan yordam so‘rashingiz kerak bo‘lgan payt yaqinlashmoqda. Qozog‘istonda bo‘lgani kabi inqiroz yuz berganda, hamma Putindan yordam so‘raydi. Biz (KXSHT) tezkorlik bilan harakat qilib, u yerga kuchlarni jo‘natdik va tartibsizliklarni bartaraf etdik”, dedi u.
Lukashenko favqulodda vaziyatlarda MDH mamlakatlari yana Rossiya va Belarusdan yordam so‘rashiga ishonch bildirdi. Shuningdek, sobiq ittifoq hududida iqtisodiy aloqalarni saqlab qolish muhimligini aytdi.
“Qozog‘iston yoki O‘zbekiston mahsulotlarini Amerika yoki Yevroittifoqda kim kutmoqda? Yo‘q, ular Rossiyaga sotishga intilishmoqda. Bizda umumiy bozor bor va uni yo‘qotish maqsadga muvofiq emas”, deya ta’kidladi Lukashenko.
Bundan tashqari, u Armanistondagi vaziyat haqida fikr bildirib, mamlakat “MDH davlatlaridan boshqa hech kimga kerak emas”ligini aytdi.
Mayli, o‘z iqtisodiyotlarini rivojlantirishsin va o‘z resurslariga tayanishsin. Qanday Fransiya yoki Makron? Ertaga u yo‘q bo‘ladi va hamma Armanistonni unutib yuboradi, deya Lukashenko so‘zlaridan “Gazeta.uz” iqtibos keltirdi.
Izoh (0)