Беларусь президенти Александр Лукашенконинг баёноти ортидан Қозоғистон Ташқи ишлар вазирлиги мамлакатдаги Беларусь элчисини чақиртирди. Бу ҳақда вазирлик сайтида хабар берилди.
Лукашенко айрим собиқ совет давлатларини Россияга нисбатан худбинликда айблаб, улар Россияга ҳеч нарса таклиф қилмасдан, ундан фойда олишга интилаётганини айтганди. Беларусь президенти Қозоғистондаги январь воқеаларини эслаб, республика Хитой, Ҳиндистон ёки Покистонга эмас, Москва ва Минскка мурожаат қилганини айтган.
“Россиядан ёрдам сўрашингиз керак бўлган пайт яқинлашмоқда. Қозоғистонда бўлгани каби инқироз юз берганда, ҳамма Путиндан ёрдам сўрайди. Биз (КХШТ) тезкорлик билан ҳаракат қилиб, у ерга кучларни жўнатдик ва тартибсизликларни бартараф этдик”, деган эди Лукашенко.
Қозоғистон ТИВ мазкур баёнот ортидан Беларусь элчиси Утюпинни чақиртирди. Ташқи ишлар вазири Мурат Нуртлеу элчи билан суҳбатда Беларусь ”жорий жараёнларга нисбатан” Қозоғистон позициясини холисона баҳолаши кераклигини айтди.
Беларусь элчиси Павел Утюпин билан икки томонлама даражада ҳам, кўп томонлама ташкилотлар доирасида ҳам Қозоғистон-Беларусь ҳамкорлигининг долзарб масалалари муҳокама этилди. Хусусан, вазир Қозоғистон БМТ устави ва халқаро ҳуқуқнинг асосий меъёрларига мувофиқ мувозанатли ва тинчликпарвар ташқи сиёсат олиб бораётганини таъкидлади.
Мамлакатимиз давлатлар ўртасидаги барча келишмовчиликлар сиёсий-дипломатик воситалар орқали ҳал этилиши кераклигига қатъий ишонч билдирди. Ҳозирги геосиёсий вазиятда давлат раҳбари томонидан ишлаб чиқилган мамлакатнинг ташқи сиёсати курси ўз самарадорлигини исботлади”, дейилади Қозоғистон ТИВ баёнотида.
Изоҳ (1)
Shunchaki izoh yozish protsesi bn tanishdim