O‘zbekistonda dizel ishlab chiquvchi bir necha korxonalar mavjud bo‘lsa–da, mahsulot importi yildan yilga oshib bormoqda. Buni oxirgi uch yillik raqamlarda ko‘rish mumkin.
Bojxona qo‘mitasi joriy yil avgust oyidan 722 turdagi iste’mol tovarlari importi bo‘yicha onlayn maʼlumot bera boshladi. Qo‘mita veb–saytida yoqilg‘i–energetika va neft mahsulotlari importi bo‘yicha ham statistik raqamlar keltirilgan. Platformada so‘ngi uch yilda mamlakatga xorijdan dizel yonilg‘isi olib kelish hajmi yetti baravar oshgani ma’lum qilingan. Xususan, 2024-yil yanvar–iyul oylarida mamlakatga jami qiymati 168,6 million dollarlik 206,9 million tonna dizel import bo‘lgan.
O‘tgan 2023-yilning dastlabki yetti oyida xorijdan 137,5 million dollarlik 169 tonna, 2022-yilning mos davrida 23,7 million dollarlik 28,2 million tonna dizel sotib olingan. Yaʼni joriy yil boshidan iyulgacha bo‘lgan davrda 2022-yil yanvar–iyul oylaridagidan yetti karra ko‘proq dizel importi amalga oshirilgan.
Respublikada dizel mahsuloti 2022-yilda ish boshlagan, loyiha qiymati 3,6 milliard dollarlik Uzbekistan GTL zavodida, shuningdek, Buxoro va Farg‘ona neftni qayta ishlash zavodlarida ishlab chiqariladi.
Bundan bir yil ilgari jurnalistlar bilan muloqotda “O‘zbekneftgaz” AJ boshqaruv raisi Bahodir Siddiqov Uzbekistan GTL zavodida asosan dizel ishlab chiqarilayotganini aytgandi. Kompaniya rahbari o‘z so‘zida zavod O‘zbekistonni dizelga bo‘lgan ehtiyojini to‘laqonli qoplay olishini taʼkidlagan.
“Bir tonna ham import qilmasdan mamlakatni dizel mahsuloti bilan qoplashga imkoniyatimiz bor. Yaqinda dizel narxlarini ham tushirdik. Zavod dastlabki ochilganida dizel narxining tonnasi 15–16 million so‘m edi, hozir esa 9 million 600 ming so‘mgacha pasaytirildi. Hozirgi kunda biz importga ham to‘liq raqobatbardosh bo‘ldik”,—degan davlat korxonasi masʼuli.
Bahodir Siddiqov fikrini davom ettirib, “O‘zbekneftgaz”ga qarashli Uzbekistan GTL zavodi uchun qilingan xarajatlar 9-yilda o‘zini oqlashini aytgan.
“Zavod qurilishi uchun 10-yillik kredit olganmiz. Ham kreditlarini qoplab, 10-yilning ichida oyoqqa turib ketishi kerak. GTL 2022-yil iyunda ishlashni boshlagan. Zavodning bitta liniyasi kuniga 2 million dollarli mahsulot ishlab chiqaradi”,—degan “O‘zbekneftgaz” AJ raisi.
Statistika agentligi maʼlumotlariga ko‘ra, 2024-yil yanvar–iyul oylarida mamlakatda ishlab chiqarilgan dizel hajmi 2023-yil mos darvidagidan 1, 7 foizga kamaygan.
Izoh (0)