Baʼzi blogerlar bu qimmat zavod, deydi — Uzbekistan GTL haqidagi eʼtirozlar o‘rinsiz ekani aytildi

“O‘zbekneftgaz” AJ 25–26-avgust kunlari Qashqadaryo viloyatiga press-tur tashkil etdi. OAV vakillari “Sho‘rtan” gaz konida bo‘lib, jamiyat faoliyati bilan bog‘liq savollariga javob oldi. “Daryo” muxbirining savollaridan biri “O‘zbekneftgaz”ga qarashli Uzbekistan GTL zavodi to‘g‘risida bo‘ldi.

“Ijtimoiy tarmoqlardagi baʼzi faollar GTL zavodi faoliyati va axborotlarini yopiq deyishadi. Qolaversa, zavod qurilishi qimmatga tushgani haqida ham eʼtirozlar bor. GTL ochilgandan beri qay darajada samaradorlik ko‘rsatyapti”, degan savolga “O‘zbekneftga” AJ boshqaruv raisi Bahodir Siddiqov javob berdi.

“Bugungi kunda zavodda asosan dizel yonilg‘isi ishlab chiqarilyapti. Uni o‘zimizning bozor standartlarini olish va mahsulotni iste’molchilarga tanishtirishga biroz vaqtimiz ketdi. Mana endi bozor yurdi. Hozirda zaxiramiz yetarli. O‘zbekistonni dizelga bo‘lgan ehtiyojini to‘laqonli qoplay olamiz. Ya’ni 1 tonna ham import qilmasdan mamlakatni dizel mahsuloti bilan qoplashga imkoniyatimiz bor. Yaqinda dizel narxlarini ham tushirdik. Zavod dastlabki ochilganida dizel narxining tonnasi 15–16 million so‘m edi, hozir esa 9 million 600 ming so‘mgacha pasaytirildi. Hozirgi kunda biz importga ham to‘liq raqobatbardosh bo‘ldik. GTL zavodining loyihalashtirish bosqichida o‘zim qatnashganman. Bunday zavod juda noyob hisoblanadi. U eng zamonaviy talabalar asosida qurilgan. Ba’zi blogerlarimiz bu qimmat zavod, deydi. Lekin bir narsani aytmoqchimanki, bu zavod “proyektniy finansirovaniye” asosida qurilgan. Bu degani kreditorlar loyihaga pul berganda texnik, ekologik, iqtisodiy va boshqa taraflarini o‘rganib, 100 foiz kafolat bo‘lmaguncha bir so‘m ham bermaydi. Shuning uchun ayrim mutaxassislarning fikrlariga qo‘shilmayman”, — dedi jamiyat rahbari.

Bahodir Siddiqovning aytishicha, zavod uchun qilingan xarajatlar 9 yilda o‘zini oqlashi rejalashtirilgan.

“Zavod qurilishi uchun 10 yillik kredit olganmiz. Ham kreditlarini qoplab, 10 yilning ichida oyoqqa turib ketishi kerak. GTL 2022-yil iyunda ishlashni boshlagan. Hozir bitta liniyasida ozgina ishlari bor, to‘g‘rilayapmiz. Zavodning bitta liniyasi kuniga 2 million dollarli mahsulot ishlab chiqaradi. Eksport bozorini ham o‘rganyapmiz, juda ham yaxshi narxlar bo‘ladi Xudo xohlasa. Bu juda tez o‘zini oqlaydi”,—dedi “O‘zbekneftgaz” AJ raisi.

Avvalroq Bahodir Siddiqov GTL’da ishlab chiqarilayotgan dizel “Yevro–6” standartlariga javob berishini, 2022-yilda ushbu mahsulotdan Tojikistonga 12 000 tonna, joriy yil iyulda Estoniyaga 1000 tonna sotilganini aytgandi. Uning ta’kidlashicha, hozirda estoniyaliklar yana 10 000 tonna, gruziyaliklar 33 000 tonna, tojiklar 5 000 tonna mazkur markadagi dizelga buyurtma bergan.