“O‘zbekiston — 2030” strategiyasida eksport hajmini 45 milliardga, yalpi ichki mahsulotni 160 milliardga, turistlar sonini 15 millionga, investitsiyalar hajmini 250 milliardga olib chiqish belgilangan. Bu qay darajada reallikka yaqin? Buni bajarish mumkinmi?
Ushbu savollarga “Daryo” bilan suhbat vaqtida Strategik islohotlar agentligi direktorining birinchi o‘rinbosari Abdulla Abduqodirov va Iqtisodiyot assambleyasi raisi Muxtor Umarov javob berdi.
Abdulla Abduqodirovning fikricha, raqamlar ikkinchi darajali ahamiyatga ega bo‘lishi, birinchi navbatda inson uchun qadrli bo‘lgan narsalar haqida ko‘proq o‘ylashimiz kerak.
“Bugun 2024-yilning o‘rtasiga kelib O‘zbekiston yalpi ichki mahsuloti 101 milliard dollarga chiqdi. 160 milliardga ham shunday qilib chiqishimiz mumkin. Ya’ni bu faqat raqamlar bo‘lgani uchun narx-navoni shishirib, qilishni iloji bor. Lekin mahsulotlarni fizik hajmi shunday turaveradi. Bunday raqamlarni maqsad qilib qo‘yishimiz qanchalik to‘g‘ri? Nazarimda, boshqacha maqsadlarni oldimizga qo‘yishimiz kerak edi, ya’ni inson uchun qadrli bo‘lgan narsalar haqida ko‘proq o‘ylashimiz zarur. Bunday raqamlar ikkinchi darajali ahamiyatga ega”, deydi Abdulla Abduqodirov.
Iqtisodiyot assambleyasi raisi Muxtor Umarov esa eksport, turistlar oqimi va yalpi ichki mahsulotni xususiy sektor yaratishini, shu boisdan hukumat “O‘zbekiston — 2030” strategiyasida qo‘yilgan maqsadlarga erishish uchun xususiy sektor bilan kelishib olishi zarurligini aytib o‘tdi.
“Hukumat “O‘zbekiston — 2030” strategiyasida qo‘yilgan maqsadlarga erishaman desa, xususiy sektor bilan kelishib olishi kerak. Chunki eksport, turistlar oqimi va yalpi ichki mahsulotni xususiy sektor yaratadi. Hozir biz buning aksini ko‘rmoqdamiz. Yo‘llarimiz ayro bo‘lib qolgan.
Menimcha, “O‘zbekiston — 2030” strategiyasida qo‘yilgan maqsadlarga erishish uchun kichik va o‘rta biznes kesimida chet el kompaniyalarini O‘zbekistonga taklif qilish kerak. Masalan, IT Parkda chet el IT kompaniyalari uchun maxsus hududlar tashkil qilindi va imtiyozlar berildi. Natijada Qozog‘istondan, Qirg‘izistondan, Rossiya va Ukrainadan IT kompaniyalari o‘z rezidensiyasini O‘zbekistonga olib keldi. Nega biz boshqa sohalarga shunday kompleks tarzda yondasha olmayapmiz? Axir, jalb qilsak bo‘ladi-ku”, dedi Muxtor Umarov.
Ma’lumot o‘rnida, “O‘zbekiston — 2030” strategiyasi davlat rahbarining 2023-yil 11-sentyabrdagi PF–158-sonli farmoni bilan tasdiqlangan. Uning maqsadlari qatoriga 2030-yilga qadar iqtisodiyot hajmini 2 barobar oshirish va “daromadi o‘rtachadan yuqori bo‘lgan davlatlar” qatoriga kirish kabi muhim vazifalar belgilab berilgan.
Izoh (0)