Bugungi kunda O‘zbekiston va Markaziy Osiyo davlatlari o‘rtasidagi chegaralarni haqli ravishda do‘stlik va yaxshi qo‘shnichilik ko‘prigi, deb atash mumkin. Bu haqda prezidentning tashqi siyosat masalalari bo‘yicha maxsus vakili Abdulaziz Komilov “O‘zbekiston tashqi siyosatida Yangi Markaziy Osiyo” nomli maqolasida qayd etgan.
Unda O‘zbekiston Qozog‘iston bilan chegarani huquqiy rasmiylashtirishni to‘liq yakunlagani, Turkmaniston, Tojikiston va Qirg‘iziston bilan chegarani delimitatsiya qilgani qayd etilgan. Chegaradagi o‘nlab o‘tkazish punktlari o‘z faoliyatini tiklab, mamlakatlar o‘rtasida odamlarning harakatlanishini sezilarli darajada osonlashtirgani ta’kidlangan.
2023-yil 1-sentyabrdan boshlab ichki hujjat — fuqaro ID-kartasini taqdim etgan holda O‘zbekiston—Qirg‘iziston chegarasini kesib o‘tish tartibi amal qilib kelmoqda. Maqolada qayd etilishicha, xuddi shunday loyiha Qozog‘iston tomoni bilan ham muhokama qilinmoqda.
O‘zbekiston—Qirg‘iziston fuqarolari uchun Davlat chegarasini kesib o‘tishning soddalashtirilgan yagona tartibiga ko‘ra, ikki davlat fuqarolari 60 kungacha identifikatsiya ID-kartasi bilan ikki davlat hududlariga kirishlari, harakatlanishlari va unda bo‘lib turishlari mumkin.
O‘zbekiston fuqarolari xorijga chiqish biometrik pasporti bilan Qirg‘izistonga kirishi, undan chiqishi va tranzit orqali boshqa davlatlarga o‘tishi mumkin. Ilgari faqat xorijga chiqish pasporti bilan mumkin edi.
Fuqarolarning chegaradan kirish-chiqishi haqidagi ma’lumotlar elektron tarzda qayd etiladi, pasportga shtamp bosishga hojat qolmaydi. Ushbu yengillik istalgan transport orqali (samolyot, poyezd, avtomobil, avtobus va hokazo) chegarani kesib o‘tishda amal qiladi.
Shavkat Mirziyoyev 2024-yil 9-avgust kuni Markaziy Osiyo davlatlari rahbarlari Maslahat uchrashuvida Markaziy Osiyo mamlakatlari milliy ID-kartalarini o‘zaro tan olish taklifini ilgari surdi. Prezident turistik almashuvni kengaytirish maqsadida “Bitta tur — butun mintaqa” tamoyili bo‘yicha milliy ID-kartalarni o‘zaro tan olish va ommaviy turistik mahsulotlarni ishlab chiqish masalalarini o‘rganib chiqishni taklif qildi.
Izoh (0)