Qirg‘iziston—O‘zbekiston chegarasidan ID-karta orqali o‘tishga ruxsat berilishi haqida xabar berilgan edi. TIV matbuot xizmati ushbu tartib 1-sentabrdan boshlab yo‘lga qo‘yilishini e’lon qildi.
Ma’lum qilinishicha, 25-avgustda O‘zbekiston hukumati bilan Qirg‘iziston hukumati o‘rtasida fuqarolarning o‘zaro kelib-ketishlari to‘g‘risidagi bitimga o‘zgartirishlar kiritish haqida bayonnoma (Bishkek shahri, 2023-yil 27-yanvar) kuchga kirdi.
Ikki davlat hududiga kirish, undan chiqish, tranzit o‘tish, harakatlanish va unda bo‘lib turish uchun ID-kartasidan amalda foydalanish o‘zaro kelishuvga ko‘ra, 2023-yil 1-sentabr soat 00:00 dan boshlab yo‘lga qo‘yiladi.
Bayonnoma bilan kiritilgan o‘zgartirishlarga muvofiq, ikki davlat fuqarolari uchun davlat chegarasini kesib o‘tishning soddalashtirilgan yagona tartibi joriy etildi. Jumladan, bundan buyon O‘zbekiston va Qirg‘iziston fuqarolari 60 kungacha ID-karta bilan ikki davlat hududlariga kirishi, harakatlanishi va unda bo‘lib turishi mumkin.
Ushbu tartib, ayniqsa, O‘zbekistonning eksklav hududlari bo‘lgan So‘x, Shohimardon, Cho‘ng‘ara kabi hududlaridagi fuqarolar uchun yengillik bo‘ladi, ularning chegaradan o‘tishlaridagi ortiqcha byurokratiyaga chek qo‘yadi.
O‘zbekiston fuqarolari xorijga chiqish biometrik pasporti bilan Qirg‘izistonga kirish, undan chiqish va tranzit orqali boshqa davlatlarga o‘tishi mumkin.
Fuqarolarning chegaradan kirish-chiqishi haqidagi ma’lumotlar elektron tarzda qayd etiladi, pasportga shtamp bosishga hojat qolmaydi. Ushbu yengillik istalgan transport orqali (samolyot, poyezd, avtomobil, avtobus va hokazo) chegarani kesib o‘tishda amal qiladi.
Izoh (0)