“Farg‘ona” chegara bojxona posti hamda “Oq-qiya” bojxona punkti uzluksiz ishlaydigan bo‘ldi. Bu haqda Bojxona qo‘mitasi matbuot xizmati xabar berdi.
Qayd etilishicha, 26-iyuldan boshlab Farg‘ona viloyati bojxona boshqarmasining “Farg‘ona” chegara bojxona posti hamda Shohimardonga kirish qismida joylashgan “Oq-qiya” bojxona punkti tun-u kun ishlash rejimiga o‘tkazildi.
“Endilikda Shohimardonga dam olgani borayotgan fuqarolar ushbu bojxona obyektlari orqali istalgan vaqtda harakatlanish imkoniyatiga ega bo‘ldi. Umid qilamizki, ushbu yangilik mamlakatimizda ichki va tashqi turizmning rivojlanishiga o‘ziga xos turtki beradi”, deyiladi xabarda.
Mazkur yangilik Shavkat Mirziyoyev va Sadir Japarovning 2024-yil 18-iyul kuni Toshkent shahridagi uchrashuvida erishilgan kelishuvlar doirasida amalga oshdi.
Qirg‘iziston prezidentining O‘zbekistonga amalga oshirgan davlat tashrifi chog‘ida tomonlar ikkala davlat chegarasida joylashgan chegara bojxona postlaridan samarali foydalanish masalasini ko‘rib chiqqan edi.
-MDBA82Oj.jpg)
Shundan so‘ng, O‘zbekiston va Qirg‘iziston bojxona hamda chegara xizmati rahbarlari Farg‘ona viloyatidagi chegara-bojxona postlari faoliyatini birgalikda ko‘zdan kechirib, yangi bojxona postlarini tashkil etish va mavjudlaridan samarali foydalanish, bojxona postlarida tirbandliklarning oldini olish borasida mavjud imkoniyatlarni tahlil qildi.
Farg‘onada 12-iyul kuni Shavkat Mirziyoyev raisligida o‘tkazgan yig‘ilishda “Vodil” va “Oq-qiya” chegara o‘tkazish punktlari xalqaro maqomga ega emasligi sabab xorijiy turistlar Shohimardon va Yordonga O‘sh orqali aylanib o‘tishga to‘g‘ri kelayotgani aytilgandi.
Prezident bu borada qo‘shni mamlakat bilan tegishli muzokaralar olib borilayotganini ta’kidlab, mutasaddilarga Shohimardon va Yordon qishloqlari, Vodil shaharchasining master rejasini ishlab chiqishni topshirgandi.
Izoh (0)