11-avgust, yakshanba kuni Hindistonning Bihar shtatidagi ibodatxonada o‘tkazilgan festival vaqtida tiqilinch holat yuz berdi. Oqibatda yetti kishi halok bo‘ldi, yana 35 kishi turli darajada tan jarohati oldi. Bu haqda Hindistonning NDTV telekanali ma’lum qilgan.
Telekanal maʼlumotlariga ko‘ra, har yili tantanali marosim bo‘lib o‘tadigan ibodatxona oldida uzun navbat boshida turgan gulchambar sotuvchilari o‘rtasida mushtlashuv kelib chiqqan.
Guvohlarning so‘zlariga ko‘ra, Milliy kadet korpusi (qurolli kuchlar homiyligidagi ommaviy tashkilot, o‘rta maktab va kollej o‘quvchilariga boshlang‘ich harbiy tayyorgarlik ko‘rsatish bilan shug‘ullanadi) ko‘ngillilari tartibni saqlash uchun “latxi” politsiya tayoqlaridan foydalangan.
Bu esa yig‘ilganlarda vahimani yuzaga keltirib, ularni harakatlanishga majbur qilgan. Oqibatda ko‘plab insonlar tiqilinchda qolib ketgan.
Barcha jabrlanganlar davolanish uchun mahalliy shifoxonalarga yetkazilgan, deya aniqlik kiritdi NDTV.
Izoh (0)