11 август, якшанба куни Ҳиндистоннинг Биҳар штатидаги ибодатхонада ўтказилган фестивал вақтида тиқилинч ҳолат юз берди. Оқибатда етти киши ҳалок бўлди, яна 35 киши турли даражада тан жароҳати олди. Бу ҳақда Ҳиндистоннинг NDTV телеканали маълум қилган.
![](/static/2024/08/12/hind-XvAIeVCy.jpg)
Телеканал маълумотларига кўра, ҳар йили тантанали маросим бўлиб ўтадиган ибодатхона олдида узун навбат бошида турган гулчамбар сотувчилари ўртасида муштлашув келиб чиққан.
Гувоҳларнинг сўзларига кўра, Миллий кадет корпуси (қуролли кучлар ҳомийлигидаги оммавий ташкилот, ўрта мактаб ва коллеж ўқувчиларига бошланғич ҳарбий тайёргарлик кўрсатиш билан шуғулланади) кўнгиллилари тартибни сақлаш учун “латхи” полиция таёқларидан фойдаланган.
Бу эса йиғилганларда ваҳимани юзага келтириб, уларни ҳаракатланишга мажбур қилган. Оқибатда кўплаб инсонлар тиқилинчда қолиб кетган.
Барча жабрланганлар даволаниш учун маҳаллий шифохоналарга етказилган, дея аниқлик киритди NDTV.
Изоҳ (0)