AQSHning Iroqdagi harbiy bazasiga 5-avgust kuni hujum uyushtirilgan. Bu haqda Reuters nashri Yaqin Sharq manbalariga asoslanib, xabar berdi.
Iroq xavfsizlik kuchlarining ikki manbasi hujum sodir bo‘lganini tasdiqlagan. Hujum mamlakat g‘arbidagi al-Asad aviabazasida yuz bergan. Uzoq masofadan uchirilgan "Katyusha" raketalari nishonga katta aniqlikda urilgan.
Manbaga ko‘ra, ikkita raketa harbiy bazaning markaziy binosiga kelib urilgan. Oqibatda katta talafot yetkazilgan. Rasmiylar hujum manbasi va tashkilotchilarini aniqlashga kirishgan.
Dushanba kuni yuz bergan hujumda kamida besh nafar amerikalik xodim yaralangan. Halok bo‘lganlar haqida hozircha maʼlumot mavjud emas.
Reuters agentligi bilan suhbatlashgan AQSH rasmiylarining aytishicha, yaralangan amerikaliklardan biri og‘ir ahvolda. Hozirda yaralanganlarga yordam ko'rsatilmoqda.
AQSH bazasiga hujum G‘arb hukumatlarini sergaklantirgan. Tahlilchilar bazaga hujum Eron va “Hizbulloh” Isroilga javob zarbasi yo‘llagan taqdirda AQSH ham istisno qilinmasligini anglatishi mumkinligini bildirgan.
AQSH mudofaa vaziri Lloyd Ostin va Isroil mudofaa vaziri Yoav Gallant hujumdan so‘ng o‘zaro telefon muloqotida bo‘lgan. Unda aytilishicha, tomonlar “xavotirli eskalatsiya” yuz bergan taqdirda birga harakat qilishga kelishib olgan.
Maʼlumotlarga ko‘ra, AQSH hozirda Iroq hududida 2500 kishilik harbiy kontingentni saqlab turibdi. Bag‘doddagi hukumat bu harbiy qismlarni mamlakatdan olib ketishni so‘ragan. AQSH bu talabni bosqichma-bosqich bajarishini aytgan.
Izoh (0)