AQSH harbiy bazasida terakt uyushtirishni rejalashtirgan Kuvayt fuqarosi hibsga olindi. Bu haqda Al-Arabiya nashri xabar berdi.
Voqea haqida dastlab Kuvayt Davlat prokuraturasi xabar bergan. Shaxsi oshkor qilinmagan fuqaro “taqiqlangan tashkilotga aʼzolik va mamlakat ichida terrorchilik harakatlarini rejalashtirish” aybi bilan hibsga olingan.
Hibsga olingan shaxs ijtimoiy tarmoqlarda o‘zi aʼzo bo‘lgan tashkilot faoliyati va yangiliklarining audio va video kontentini muntazam eʼlon qilib borgan. Rasmiylar hibsdagi shaxs daxldor bo‘lgan tashkilot nomini maʼlum qilmagan.
Prokuratura xabariga ko‘ra, erkak Amerika qurolli kuchlariga tegishli lagerlarni portlatish va tartibsizlik keltirib chiqarish maqsadida portlovchi moddalar yasash va ishlatishni o‘rgangan. Tergov jarayonida u barcha ayblariga iqror bo‘lgan. Unga sherik bo‘lgan bir nechta boshqa shaxslar haqida ham maʼlumot to‘plangan.
2024 yilning yanvar oyida Kuvayt ichki ishlar vazirligi xavfsizlik kuchlari shia mazhabiga mansub ibodat maskanlarida terakt uyushtirishni rejalashtirgan terroristik yacheyka aniqlanganini maʼlum qilgan edi. Buning oqibatida ushbu yacheykaga aloqador 3 nafar shaxs hibsga olingani aytilgan.
Iroq, Saudiya Arabistoni va Eron bilan chegaradosh bo‘lgan Kuvaytda AQShning bir qancha yirik harbiy bazalari joylashgan. Ushbu mamlakatda 2015-yilda xudkush-terrorchi shia musulmonlari ibodat qiladigan masjidda terakt sodir etgan edi. Hodisa oqibatida 27 kishi halok bo‘lgan. Hujum jangarilarning so‘nggi o‘n yilliklardagi eng qonli hujumlaridan biri deb hisoblangan. Terakt uchun javobgarlikni ISHID tashkiloti o‘z zimmasiga olgan.
Izoh (0)