АҚШнинг Ироқдаги ҳарбий базасига ҳужум уюштирилди

АҚШнинг Ироқдаги ҳарбий базасига 5 август куни ҳужум уюштирилган. Бу ҳақда Reuters нашри Яқин Шарқ манбаларига асосланиб, хабар берди.

Ироқ хавфсизлик кучларининг икки манбаси ҳужум содир бўлганини тасдиқлаган. Ҳужум мамлакат ғарбидаги ал-Асад авиабазасида юз берган. Узоқ масофадан учирилган "Катюша" ракеталари нишонга катта аниқликда урилган.

Манбага кўра, иккита ракета ҳарбий базанинг марказий биносига келиб урилган. Оқибатда катта талафот етказилган. Расмийлар ҳужум манбаси ва ташкилотчиларини аниқлашга киришган.

Душанба куни юз берган ҳужумда камида беш нафар америкалик ходим яраланган. Ҳалок бўлганлар ҳақида ҳозирча маълумот мавжуд эмас.

Reuters агентлиги билан суҳбатлашган АҚШ расмийларининг айтишича, яраланган америкаликлардан бири оғир аҳволда. Ҳозирда яраланганларга ёрдам кўрсатилмоқда.

АҚШ базасига ҳужум Ғарб ҳукуматларини сергаклантирган. Таҳлилчилар базага ҳужум Эрон ва “Ҳизбуллоҳ” Исроилга жавоб зарбаси йўллаган тақдирда АҚШ ҳам истисно қилинмаслигини англатиши мумкинлигини билдирган.

АҚШ мудофаа вазири Ллойд Остин ва Исроил мудофаа вазири Йоав Галлант ҳужумдан сўнг ўзаро телефон мулоқотида бўлган. Унда айтилишича, томонлар “хавотирли эскалация” юз берган тақдирда бирга ҳаракат қилишга келишиб олган.

Маълумотларга кўра, АҚШ ҳозирда Ироқ ҳудудида 2500 кишилик ҳарбий контингентни сақлаб турибди. Бағдоддаги ҳукумат бу ҳарбий қисмларни мамлакатдан олиб кетишни сўраган. АҚШ бу талабни босқичма-босқич бажаришини айтган.