Burkina-Faso hududidagi harbiy bazaga 11-iyun kuni uyushtirilgan hujum oqibatida 100 nafardan ortiq askar halok bo‘lgan. Bu haqda mahalliy manbalarga tayanib, BBC xabar berdi.
Manbada aytilishicha, 2022-yilda harbiylar hokimiyatga kelgan mamlakatda so‘nggi bir necha oyda xavfsizlik bilan bog‘liq vaziyat yomonlashgan. Harbiylar o‘rtasida muntazam ravishda to‘qnashuvlar yuz bergan.
Burkina-Faso hukumati bir necha yildan beri diniy radikal guruhlarga qarshi kurashib keladi. Bugungi kunda ham mamlakatning qariyb yarmi hukumat nazoratidan tashqarida hisoblanadi.
11-iyun kuni Mansila shahridagi harbiy bazaga uyushtirilgan hujumda ham harbiy xunta diniy guruhlarni ayblagan. “Jamoat nusrat al-Islom val-muslimin” (JNIM) ektremistik guruhi terakt ortida turgani eʼlon qilingan.
Mansilaga hujumda 100 ga yaqin askar halok bo‘lgani tasdiqlangan. Askarlar hukumat tergovidan so‘ng oilalariga topshirilgan.
12-iyun kuni Burkina-Faso Markaziy davlat televideniyesi shtab-kvartirasi yonida ham portlash yuz bergan. Buning oqibatida 10 ga yaqin kishi jarohatlangan. Halok bo‘lganlar haqida maʼlumot yo‘q.
Terakt uyushtirishda ayblangan “Jamoat nusrat al-Islom val-muslimin” guruhi “Al-Qoida”ning bo‘limi sifatida qaraladi. Mavjudligi asosan Markaziy Afrika mintaqasida bo‘lgan bu tuzilma terrorchi birlashma deya eʼtirof etilgan.
Burnika-Fasoning amaldagi rahbari Kapitan Ibrohim Traore teraktdan keyin hukumat maxsus operatsiya boshlaganini bildirgan. Hujum ortidan Mansila shaharchasini tark etgan aholini qidirish bo‘yicha ham tadbirlar tashkil etilgan
G‘arb nashrlari harbiy bazaga hujum hukumat ichidagi unga muxolif kuchlar tomonidan amalga oshirilganini bildirgan. Agar bu tasdiqlansa, Traore boshchiligidagi harbiy xuntaga qarshi mamlakatda isyon ko‘tarilgani ayon bo‘ladi.
Burkina-Fasoda hozirda barcha davlat muassasalari va OAV nazoratga olingan. Hukumat faoliyati haqida tasdiqlanmagan maʼlumot tarqatishga qatʼiy cheklov qo‘yilgan.
Izoh (0)