AQSHning Yevropadagi harbiy bazalari yuqori shay holatga keltirildi

AQSHning Yevropadagi bir qator harbiy bazalari yuqori shay holatga keltirildi, xavfsizlik darajasi AQSH qo‘shinlari yoki inshootlari terroristik hujumga duchor bo‘lishi mumkinligidan xavotirlar fonida ikkinchi eng yuqori darajaga ko‘tarildi. Bu haqda ismi oshkor etilmagan ikki amerikalik rasmiyga tayanib, CNN xabar berdi.

Germaniyaning Shtutgart shahridagi AQSH armiyasi garnizonining jangovar tayyorgarligi “Charli” holatiga keltirilgan. Bu terroristik hujumlar ehtimolini ko‘rsatadigan razvedka ma’lumotlari olinganda qo‘llaniladi. Ikki AQSH rasmiysiga ko‘ra, ehtimoliy terakt amerikalik harbiy xizmatchilar va harbiy obyektlarni nishonga olishni nazarda tutadi. CNN manbalaridan biri bunday darajadagi tahdid kamida o‘n yil davomida sodir bo‘lmaganini ta’kidladi.

Pentagon munosabati

AQSH Mudofaa vazirligi qo‘shinlar xavfsizligini ta’minlash uchun tez-tez qo‘shimcha xavfsizlik choralarini ko‘rishini bildirdi. Pentagon Yevropadagi bir necha harbiy bazalar ehtimoliy teraktlar xavfi tufayli yuqori shay holatga keltirilgani haqidagi maʼlumotga shunday javob berdi. AQSH Yevropa qo‘mondonligi matbuot kotibi Den Day esa bunga munosabat bildirmadi.