Samarqandda davlat byudjetiga 3 milliard 602 million so‘mdan ziyod qo‘shimcha bojxona to‘lovlari hisoblandi. Bu haqda viloyat bojxona boshqarmasi matbuot xizmati xabar berdi.
Qayd etilishicha, Samarqand viloyati bojxona boshqarmasining Shaxsiy xavfsizlik sho‘basi va masʼul tarkibiy tuzilmalari tomonidan tovarlarning bojxona nazorati va rasmiylashtiruvini amalga oshirish davomida navbatdagi bojxona qoidabuzari aniqlangan.
Samarqand shahrida faoliyat yuritayotgan korxonalardan birining nomiga xorijdan keltirilgan oziq-ovqat va qishloq xo‘jaligi mahsulotlarini saqlash uchun sovitish tizimi tovarini “erkin muomalaga chiqarish” bojxona rejimiga rasmiylashtirish uchun taqdim etilgan bojxona yuk deklaratsiyasi va hujjatlari o‘rganilganda, mazkur tovarlarning TIF TN kodi noto‘g‘ri tasniflangani maʼlum bo‘lgan.
Hujjatlarda tovarning TIF TN kodini noto‘g‘ri belgilanishining oldini olish orqali davlat byudjetiga 3 milliard 602 million so‘mdan ziyod qo‘shimcha bojxona to‘lovlari hisoblangan.
Hozirda holat yuzasidan bojxona organlari tomonidan tergovga qadar tekshiruv harakatlari olib borilmoqda.
- Avvalroq “Yallama” postida 830 mln so‘mlik LED chiroqlarning mamlakatga noqonuniy olib kirilishiga chek qo‘yilgani to‘g‘risida xabar berilgandi.
- Shuningdek, Buxoroda 15,5 mlrd so‘mlik pestitsidlarning mamlakatga noqonuniy olib kirilishining oldi olingan edi.
Izoh (0)