Toshkent shahar bojxona boshqarmasi xodimlari salkam 3 milliard so‘mlik matolarni bojxona to‘lovlarisiz olib kirilishiga chek qo‘ydi.
Qayd etilishicha, “Ark buloq” tashqi iqtisodiy faoliyat bojxona postida aniqlangan dastlabki holatda poytaxtdagi mas’uliyati cheklangan jamiyatlardan birining nomiga keltirilgan 106 ming metr kvadrat o‘lchamdagi matolar bojxona ko‘rigidan o‘tkazilgan.
Natijada, ushbu tovarlarga tegishli kodlar bojxona yuk deklaratsiyasida noto‘g‘ri qayd etilgani aniqlangan. Shu tariqa qiymati 2 milliard 128 million so‘mlik matolarni imtiyoz asosida, yaʼni bojxona to‘lovlarisiz olib kirishga bo‘lgan urinishning oldi olingan.
Mazkur postda aniqlangan xuddi shunday yana bir holatda ham bojxona yuk deklaratsiyasida tovar kodini noto‘g‘ri tasniflash orqali qiymati 784 million so‘mlik salkam 13 tonna matolarni bojxona to‘lovlarisiz olib kirishga bo‘lgan urinishning oldi olingan.
Hozirda aniqlangan holatlar yuzasidan bojxona tekshiruvlari davom ettirilmoqda.
- Avvalroq “Yallama” postida 830 mln so‘mlik LED chiroqlarning mamlakatga noqonuniy olib kirilishiga chek qo‘yilgani to‘g‘risida xabar berilgandi.
- Shuningdek, Buxoroda 15,5 mlrd so‘mlik pestitsidlarning mamlakatga noqonuniy olib kirilishining oldi olingan edi.
Izoh (0)