Самарқандда давлат бюджетига 3,6 млрд сўмдан зиёд қўшимча божхона тўловлари ҳисобланди

Самарқандда давлат бюджетига 3 миллиард 602 миллион сўмдан зиёд қўшимча божхона тўловлари ҳисобланди. Бу ҳақда вилоят божхона бошқармаси матбуот хизмати хабар берди.

Қайд этилишича, Самарқанд вилояти божхона бошқармасининг Шахсий хавфсизлик шўбаси ва масъул таркибий тузилмалари томонидан товарларнинг божхона назорати ва расмийлаштирувини амалга ошириш давомида навбатдаги божхона қоидабузари аниқланган.

Самарқанд шаҳрида фаолият юритаётган корхоналардан бирининг номига хориждан келтирилган озиқ-овқат ва қишлоқ хўжалиги маҳсулотларини сақлаш учун совитиш тизими товарини “эркин муомалага чиқариш” божхона режимига расмийлаштириш учун тақдим этилган божхона юк декларацияси ва ҳужжатлари ўрганилганда, мазкур товарларнинг ТIF ТN коди нотўғри таснифлангани маълум бўлган.

Ҳужжатларда товарнинг ТIF ТN кодини нотўғри белгиланишининг олдини олиш орқали давлат бюджетига 3 миллиард 602 миллион сўмдан зиёд қўшимча божхона тўловлари ҳисобланган.

Ҳозирда ҳолат юзасидан божхона органлари томонидан терговга қадар текширув ҳаракатлари олиб борилмоқда.

• Аввалроқ “Яллама” постида 830 млн сўмлик LED чироқларнинг мамлакатга ноқонуний олиб кирилишига чек қўйилгани тўғрисида хабар берилганди.
• Шунингдек, Бухорода 15,5 млрд сўмлик пестицидларнинг мамлакатга ноқонуний олиб кирилишининг олди олинган эди.