Agar Moldova 1940-yillardagi ocharchilikda Sovet Ittifoqini ayblasa, mamlakatda Ukraina taqdiri takrorlashi mumkin, deya Rossiya Xavfsizlik kengashi raisi o‘rinbosari Dmitriy Medvedev fikr bildirdi.
Medvedev Moldova parlamenti spikeri Igor Grosuning Moldovada urushdan keyingi 1946—1947-yillardagi ocharchilikni genotsid deb tan olishga chaqirgan so‘zlariga shu tarzda izoh bergan.
“Ukrainada 2006-yilda “Golodomor ertaklari”ning tegishli qonun shaklida rasmiylashtirilishidan 2014-yilda birinchi fashistlar batalyonini, keyin esa Azov polki va brigadasini yaratishgacha bo‘lgan yo‘l 10 yildan kamroq vaqtni oldi”, deydi Medvedev.
Uning so‘zlariga ko‘ra, bularning barchasi “mamlakatni fashistlashtirishdan jamiyatda nafrat muhitini yaratishgacha bo‘lgan bir zanjirning bo‘g‘inlaridir”.
“Va bularning barchasi tarix bilan o‘ynashishdan kelib chiqqan. Yangi urush boshlanmasligi uchun tarix bilan o‘ylamasdan o‘ynashmaslik kerak! Yoki Moldova ham haqiqatan Ukraina taqdirini baham ko‘rmoqchimi?” deya xulosa qilgan Xavfsizlik kengashi raisining o‘rinbosari.
O‘tgan yil oxirida Rossiya TIV rahbari Sergey Lavrov G‘arb Moldovani Ukraina Rossiyaga qarshi boshlangan gibrid urushdan keyin “navbatdagi qurbon” bo‘lishga tayyorlayotganini aytgan. Xususan, u YI va NATOni Dnestryan mojarosini hal qilish bo‘yicha muzokaralar formatini “o‘ldirishda” ayblagan.
Shu bilan birga, Lavrov Moldova “jabrlanganlar” ro‘yxatida oxirgi bo‘lmasligi mumkinligiga ishora qilgan.
“G‘arb emissarlari, jamg‘armalari va nodavlat notijorat tashkilotlari hozir faol bo‘lgan har bir davlat bu haqda o‘ylab ko‘rishi kerak”, deya Lavrov Ukrainada “Rossiyaga qarshi urush maydoni” yaratish uchun 2014-yilda davlat to‘ntarishi va Donbassda sakkiz yillik janglar zarur bo‘lganini eslatib o‘tgan.
Moldova rasmiylari avvalroq Moskvani mamlakatda davlat to‘ntarishi uyushtirishni rejalashtirganlikda ayblagan edi. Respublika prezidenti Mayya Sandu Rossiya Ukrainaga “Moldova Respublikasiga harbiy quruqlik yo‘lagi yaratish niyatida bostirib kirganini, bu konstitutsiyaviy tuzumni zo‘ravonlik bilan o‘zgartirish va davlatchilikni yo‘q qilish uchun zarur shart-sharoitlarni yaratishi”ni ta’kidlagan.
Moldovaning yangi milliy xavfsizlik strategiyasida Rossiya “tahdid” deb atalgan.
Izoh (0)