Farg‘ona viloyati hokimi Xayrullo Bozorov viloyatning Quvasoy shahridagi barcha bog‘chalarga tayyor ovqat yetkazib berish huquqini hech qanday tanlov yoki tendersiz tadbirkorga tuhfa qilgani, hokimning bu haqdagi qarori jamoatchilikdan yashirilgani haqida xabar berilgandi.
Shuningdek, Raqobat qo‘mitasi Farg‘ona viloyati hokimligiga ko‘rsatma xati yuborgan.
Mazkur holat yuzasidan Maktabgacha va maktab taʼlimi vazirligi masʼullari tomonidan o‘tkazilgan dastlabki o‘rganishlarda quyidagi xulosalar qayd etildi.
Keytering tashkiloti tomonidan taklif qilinayotgan taomlarning retseptura to‘plami, tarkibiy qismi hamda energetik qiymati SanQ va M 0016-21 talablari asosida ishlab chiqilmagan.
Tarbiyalanuvchilarga yetkazib beriladigan taomlarni tashish, saqlash hamda isteʼmolga berilishiga qo‘yiladigan sanitariya-gigiyena talablari bo‘yicha tizimli ishlar belgilab olinmagan.
Keytering tashkiloti tomonidan tarbiyalanuvchilarga sarflanadigan oziq-ovqat mahsulotlari hamda tayyorlanadigan taomlardan olinadigan kunlik sinamalar, yaʼni bolalarga beriladigan taomlarni sifatini doimiy nazorat qilib borish bo‘yicha maxsus laboratoriya joriy qilinmagan.
“Bundan tashqari, viloyat hokimligining qaroriga asos qilib olingan Vazirlar Mahkamasining 2021-yil 30-iyundagi 407-sonli qarorida va umuman normativ huquqiy-hujjatlarda keytering usulida ovqatlantirish bilan bog‘liq tartiblar belgilanmagan. Shuningdek, “Xarid.uz” yoki boshqa portallar orqali shartnomalar tuzish bo‘yicha huquqiy asos mavjud emas. Qolaversa, O‘zbekiston Respublikasining 2021-yil 22-apreldagi “Davlat xaridlari to‘g‘risida”gi qonuni talablariga rioya etilishi shart.
Maktabgacha taʼlim tashkiloti tarbiyalanuvchilarini sog‘lom ovqatlantirish bilan bog‘liq har qanday tashabbus Maktabgacha va maktab taʼlimi vazirligi bilan kelishilgan holda, amaldagi qonun hujjatlari talabalari asosida yo‘lga qo‘yilishi lozim deb hisoblaymiz”, deyiladi xabarda.
Izoh (0)