Toshkentda tadbirkorga binoni sotishga kelishib, 2 mlrd so‘mga chuv tushirgan shaxslar ushlandi

Toshkent shahri Uchtepa tumanida tadbirkorning 2 mlrd so‘mini qo‘lga kiritgan shaxslar aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Maʼlum qilinishicha, “S.P.” MCHJning taʼsischisi Z.M. va fuqaro D.X. o‘zaro til biriktirib, tadbirkor A.Z.ning ishonchiga kirgan. Unga MCHJning Ko‘kcha darvoza ko‘chasidagi 727 kv metr maydonga ega bo‘lgan savdo va maishiy xizmat ko‘rsatish binosini sotishga kelishib, go‘yoki 5 ish kunida binoni uning nomiga o‘tkazib berishlari haqida tilxat yozib bergan.

Ular tadbirkorning 2 mlrd so‘m naqd pulini firibgarlik yo‘li bilan qo‘lga kiritgach, binoni boshqa shaxsga sotib yuborganliklari aniqlangan.

Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.