Фарғона вилояти ҳокими Хайрулло Бозоров вилоятнинг Қувасой шаҳридаги барча боғчаларга тайёр овқат етказиб бериш ҳуқуқини ҳеч қандай танлов ёки тендерсиз тадбиркорга туҳфа қилгани, ҳокимнинг бу ҳақдаги қарори жамоатчиликдан яширилгани ҳақида хабар берилганди.
Шунингдек, Рақобат қўмитаси Фарғона вилояти ҳокимлигига кўрсатма хати юборган.
Мазкур ҳолат юзасидан Мактабгача ва мактаб таълими вазирлиги масъуллари томонидан ўтказилган дастлабки ўрганишларда қуйидаги хулосалар қайд этилди.
Кейтеринг ташкилоти томонидан таклиф қилинаётган таомларнинг рецептура тўплами, таркибий қисми ҳамда энергетик қиймати СанҚ ва М 0016-21 талаблари асосида ишлаб чиқилмаган.
Тарбияланувчиларга етказиб бериладиган таомларни ташиш, сақлаш ҳамда истеъмолга берилишига қўйиладиган санитария-гигиена талаблари бўйича тизимли ишлар белгилаб олинмаган.
Кейтеринг ташкилоти томонидан тарбияланувчиларга сарфланадиган озиқ-овқат маҳсулотлари ҳамда тайёрланадиган таомлардан олинадиган кунлик синамалар, яъни болаларга бериладиган таомларни сифатини доимий назорат қилиб бориш бўйича махсус лаборатория жорий қилинмаган.
“Бундан ташқари, вилоят ҳокимлигининг қарорига асос қилиб олинган Вазирлар Маҳкамасининг 2021 йил 30 июндаги 407-сонли қарорида ва умуман норматив ҳуқуқий-ҳужжатларда кейтеринг усулида овқатлантириш билан боғлиқ тартиблар белгиланмаган. Шунингдек, “Харид.уз” ёки бошқа порталлар орқали шартномалар тузиш бўйича ҳуқуқий асос мавжуд эмас. Қолаверса, Ўзбекистон Республикасининг 2021 йил 22 апрелдаги “Давлат харидлари тўғрисида”ги қонуни талабларига риоя этилиши шарт.
Мактабгача таълим ташкилоти тарбияланувчиларини соғлом овқатлантириш билан боғлиқ ҳар қандай ташаббус Мактабгача ва мактаб таълими вазирлиги билан келишилган ҳолда, амалдаги қонун ҳужжатлари талабалари асосида йўлга қўйилиши лозим деб ҳисоблаймиз”, дейилади хабарда.
Изоҳ (0)