O‘zbekiston bosh konsuli Yusuf Kabuljanov Primorsk o‘lkasi Inson huquqlari bo‘yicha vakili Yuriy Melnikov va Rossiya Ichki ishlar vazirligining o‘lka bo‘yicha rahbariyati bilan uchrashuvlar o‘tkazdi. Bu haqda “Dunyo” AA xabar berdi.
Maʼlum qilinishicha, Primorsk o‘lkasi Inson huquqlari bo‘yicha vakili bilan kechgan muloqot chog‘ida mehnat migratsiyasi sohasida ikki tomonlama hamkorlikning dolzarb masalalari, shuningdek, mazkur hududda vaqtincha bo‘lib turgan O‘zbekiston fuqarolarining huquq va manfaatlarini himoya qilish masalalari muhokama qilindi.
O‘zbekistonda tashkil etilgan xavfsiz, tartibli va qonuniy mehnat migratsiyasi tizimi, respublika fuqarolarining huquq va manfaatlarini himoya qilish bo‘yicha ko‘rilayotgan chora-tadbirlar hamda Bosh konsulxonaning ushbu yo‘nalishdagi faoliyati haqida batafsil maʼlumot berildi.
Rossiya Ichki ishlar vazirligining Primorsk o‘lkasi rahbariyati bilan bo‘lib o‘tgan uchrashuvda ikki tomonlama hamkorlikni mustahkamlash masalalari, O‘zbekiston fuqarolarining Rossiyada bo‘lishi masalalari, fuqarolar huquqlarining buzilishi holatlari yuzasidan fikr almashildi.
O‘zbekiston fuqarolari huquqlari buzilishining oldini olish maqsadida tegishli organlarda tushuntirish va profilaktika ishlarini olib borish, huquqbuzarliklarini oldini olish uchun hamyurtlarimiz o‘rtasida targ‘ibot tadbirlarni muntazam o‘tkazish bo‘yicha kelishuvga erishildi.
Izoh (0)