Venesuelada amaldagi prezident Nikolas Maduro uchinchi muddatga o‘z lavozimiga saylandi. Bu haqda Lotin Amerikasi manbalariga tayanib, New York Post nashri xabar berdi.
Manbada aytilishicha, Maduro saylovlarda 51 foiz ovoz to‘plashga muvaffaq bo‘lgan. Ushbu ko‘rsatkich unga o‘z lavozimini saqlab qolish hamda muxolifatni yengishga imkon bergan.
Hukumat eʼlon qilgan saylov hisobotida Maduroga muxolif nomzod Edmundo Gonzales 44 foiz ovoz to‘plagani aytilgan. Muxolif vakili amaldagi prezidentga munosib raqiblik qilgan bo‘lsa-da, saylovning so‘nggi soatlarida Maduro tarafdorlari ovozlari ko‘payib ketgan.
Saylov natijalariga muxolifat keskin eʼtiroz bildirgan. Edmundo Gonzales ovozlar soxtalashtirilgani, Maduro aslida poygani boy berganini daʼvo qilib chiqqan.
“Natijalarni yashirib bo‘lmaydi. Mamlakat tinch yo‘l bilan o‘zgarishni tanladi. Biz yutdik”, degan muxolifat vakili saylovdan g‘alaba qozonganiga ishora qilib.
Muxolifat rahbarlaridan yana biri Mariya Korina Machado mamlakat harbiylarini ovoz berish natijalarini tasdiqlashga chaqirgan. Mamlakat aholisi orasida Madurodan norozilik kuchli ekani, u hech qanaqasiga saylovlarni yuta olmasligini aytgan.
“Harbiylar uchun xabarimiz bir. Venesuela xalqi sizga gapiradi: xalq Maduroni istamaydi. O‘zingizni tarixning munosib pallasiga qo‘yish vaqti keldi. Sizda imkoniyat bor va undan hozir foydalanishingiz kerak”, deya harbiylar ichida Maduroga qarshi kayfiyat uyg‘otishga uringan Mariya Korina Machado.
Maʼlumot o‘rnida, prezident Nikolas Maduro hozir 61 yoshda. Uning prezident sifatida faoliyat yuritgan yillari Karakasning AQSH va G‘arb bilan munosabatlari keskinlashuvi sifatida xarakterlanadi. Maduro davridagi Venesuela qo‘shni Gayana bilan Essekibo hududi uchun bahsga kirishgan va urush qilmasdan turib uni o‘z taʼsiriga olishga erishgan.
Venesueladagi Maduro boshqaruviga nisbatan ko‘plab G‘arb hukumatlari sanksiyalar joriy etgan. Bu esa mamlakatning milliy iqtisodiyotni himoya qilish va resurslarni xorij kapitaliga berishga taqiq qo‘yishi bilan bog‘liq.
Izoh (0)