Венесуэлада амалдаги президент Николас Мадуро учинчи муддатга ўз лавозимига сайланди. Бу ҳақда Лотин Америкаси манбаларига таяниб, New York Post нашри хабар берди.
Манбада айтилишича, Мадуро сайловларда 51 фоиз овоз тўплашга муваффақ бўлган. Ушбу кўрсаткич унга ўз лавозимини сақлаб қолиш ҳамда мухолифатни енгишга имкон берган.
Ҳукумат эълон қилган сайлов ҳисоботида Мадурога мухолиф номзод Эдмундо Гонзалес 44 фоиз овоз тўплагани айтилган. Мухолиф вакили амалдаги президентга муносиб рақиблик қилган бўлса-да, сайловнинг сўнгги соатларида Мадуро тарафдорлари овозлари кўпайиб кетган.
Сайлов натижаларига мухолифат кескин эътироз билдирган. Эдмундо Гонзалес овозлар сохталаштирилгани, Мадуро аслида пойгани бой берганини даъво қилиб чиққан.
“Натижаларни яшириб бўлмайди. Мамлакат тинч йўл билан ўзгаришни танлади. Биз ютдик”, деган мухолифат вакили сайловдан ғалаба қозонганига ишора қилиб.
Мухолифат раҳбарларидан яна бири Мария Корина Мачадо мамлакат ҳарбийларини овоз бериш натижаларини тасдиқлашга чақирган. Мамлакат аҳолиси орасида Мадуродан норозилик кучли экани, у ҳеч қанақасига сайловларни юта олмаслигини айтган.
“Ҳарбийлар учун хабаримиз бир. Венесуэла халқи сизга гапиради: халқ Мадурони истамайди. Ўзингизни тарихнинг муносиб палласига қўйиш вақти келди. Сизда имконият бор ва ундан ҳозир фойдаланишингиз керак”, дея ҳарбийлар ичида Мадурога қарши кайфият уйғотишга уринган Мария Корина Мачадо.
Маълумот ўрнида, президент Николас Мадуро ҳозир 61 ёшда. Унинг президент сифатида фаолият юритган йиллари Каракаснинг АҚШ ва Ғарб билан муносабатлари кескинлашуви сифатида характерланади. Мадуро давридаги Венесуэла қўшни Гайана билан Эссекибо ҳудуди учун баҳсга киришган ва уруш қилмасдан туриб уни ўз таъсирига олишга эришган.
Венесуэладаги Мадуро бошқарувига нисбатан кўплаб Ғарб ҳукуматлари санкциялар жорий этган. Бу эса мамлакатнинг миллий иқтисодиётни ҳимоя қилиш ва ресурсларни хориж капиталига беришга тақиқ қўйиши билан боғлиқ.
Изоҳ (0)