AQSH hukumati Sharqiy Osiyida keskinlik kuchayishi ortidan Yaponiyaga yangi harbiy qismlar joylashtiradi. Bu haqda AQSH Markaziy qo‘mondonligi bayonotiga asoslanib, CNN nashri xabar berdi.
Manbada aytilishicha, Vashington va Tokio hukumatlari 28-iyul kuni yangi harbiy kelishuvga erishgan. Ushbu kelishuv doirasida Yaponiyada joylashtirilgan G‘arb koalitsiyasi qo‘shinlari yangi bo‘linmalar bilan to‘ldiriladi va mudofaa yo‘lidagi hamkorlik kuchaytiriladi.
AQSH mudofaa vaziri Lloyd Ostin, davlat kotibi Entoni Blinken va ularning yaponiyalik hamkasblari Minoru Kixara hamda Yoko Kamikava Tokiodagi uchrashuvdan so‘ng qo‘shma bayonotda o‘z rejalarini eʼlon qilishgan. Ushbu rejalarda Xitoyning “siyosiy, iqtisodiy va harbiy tazyiqi” Osiyo-Tinch okeani mintaqasida va undan tashqarida eng katta strategik muammo ekanligi taʼkidlangan.
Yangi rejaga ko‘ra, Yaponiyadagi AQSH kuchlari “tinchlik davrida va favqulodda vaziyatlarda, qo‘shma ikki tomonlama operatsiyalar doirasida chuqurroq o‘zaro hamkorlik o‘rnatish va birgalikda qadam tashlash” uchun AQSH Hind-Tinch okeani qo‘mondonligi rahbariga bo‘ysunadigan qo‘shma kuchlar shtab-kvartirasi sifatida qayta tashkil etiladi.
Uchrashuvdan so‘ng o‘tkazilgan matbuot anjumanida AQSH mudofaa vaziri Lloyd Ostin ikki mamlakatning alyans qo‘mondonligi va nazoratini “modernizatsiya qilish” harakatini “tarixiy qaror” sifatida olqishlagan. Bu qaror ittifoqning sifat darajasini ko‘tarishi maʼlum qilingan.
“Bu AQSH kuchlarining Yaponiya tashkil etilganidan beri eng muhim tarkib o‘zgarishi va Yaponiya bilan harbiy aloqalarimiz o‘rnatilgan 70 yil davomidagi eng katta yaxshilanishlardan biri bo‘ladi”, degan Ostin.
Lloyd Ostin Yaponiya va AQSH tahdidli xatti-harakatlarni to‘xtatish va ularga javob berish bo‘yicha birgalikda ishlash qobiliyatlarini kuchaytirayotganini aytgan. Ikki mamlakatning dengizdagi manyovrlari endilikda Hind-Tinch okeani va undan tashqaridagi manzillarga ham qaratilishi bildirilgan.
Yangi kelishuvda ko‘zda tutilgan harbiy kontingent sifati va soni o‘zgarishi asosan Yokotadagi AQSH qo‘shinlari bazasiga qaratilgan. Bu bazada ayni damda 54 mingdan ortiq harbiy xizmatchi mavjud. Yokotaga AQSH qurolli qismlari 1960-yildagi bitimga asosan kiritilgan.
Kutilayotgan qayta konfiguratsiya Yaponiya o‘zining mudofaa pozitsiyasini o‘zgartirib, Ikkinchi jahon urushidan keyin Qo‘shma Shtatlar tomonidan o‘rnatilgan pasifist konstitutsiyasidan voz kechishini anglatadi. Yaponiya hukumati 2027-yilga borib harbiy byudjetni ham YIMning 2 foizigacha oshirishni maqsad qilgan.
Izoh (0)