AQSH vitse-prezidenti Kamala Harris prezidentlik saylovlarida ishtirok etishini ma’lum qildi. Bu haqda CNN xabar berdi.
Siyosatchi saylovda g‘alaba qozonish uchun qo‘lidan kelgan hamma narsani qilishini ta’kidladi. Shu bilan birga, u Jo Baydenning o‘z nomzodini qaytarib olish qarorini fidokorona va vatanparvarlik harakati deb atadi.
Prezidentning qo‘llab-quvvatlovini olganimdan faxrlanaman va bu nominatsiyasni qo‘lga kiritish va g‘alaba qozonish niyatidaman. Saylov kuniga 107 kun qoldi. Birgalikda kurashamiz va birgalikda g‘alaba qozonamiz, degan Harris.
AQSH vitse-prezidenti Baydenning saylovda qatnashmaslik qaroriga ham munosabat bildirgan.
Mazkur beg‘araz va vatanparvarlik harakati bilan Bayden o‘z hayoti davomida qilgan ishni amalga oshirdi: Amerika xalqi va mamlakatni hamma narsadan ustun qo‘yadi. Men Demokratik partiyani va millatimizni birlashtirib, Donald Tramp va uning 2025-yildagi ekstremal loyihasini mag‘lub etish uchun qo‘limdan kelganini qilaman, dedi u.
Bayden saylovda qatnashmaydi
21-iyul kuni Jo Bayden prezidentlik saylovidan o‘z nomzodini qaytarib oldi. Siyosatchi partiya va mamlakat manfaatlariga asosan shunday qarorga kelganini aytdi.
Sizning prezidentingiz sifatida xizmat qilish hayotimdagi eng katta sharaf bo‘ldi. Men qayta saylanish niyatida bo‘lgan bo‘lsam-da, o‘z partiyam va mamlakatim manfaatlariga ko‘ra, nomzodimni rad etishim va qolgan muddat davomida faqat prezidentlik vazifamni bajarishga e’tibor qaratishim kerak deb hisoblayman, degan u.
Bayden prezidentlik poygasida Kamala Harrisni to‘liq qo‘llab-quvvatlashini bildirdi. Uning ta’kidlashicha, demokratlar Trampni saylovlarda mag‘lub etish uchun hozir birlashishi kerak.
AQSH Kongressi Vakillar palatasi spikeri Mayk Jonson qaror ortidan Baydenni iste’foga chiqishga chaqirdi. Uning fikricha, keyingi muddatga prezident bo‘lishni istamagan odam hozir bu lavozimni egallamasligi lozim.
Izoh (0)