Pokistonda ikki qabila o‘rtasida yuzaga kelgan nizo oqibatida kamida 30 nafar fuqaro halok bo‘ldi. Bu haqda Arab News nashri xabar berdi.
Manbada aytilishicha, voqea Pokiston shimoli-g‘arbidagi Xayber-Paxtunxva viloyatida ro‘y bergan. Kurram tumanida ikki qabilaning mulkka egalik qilish borasidagi kelishmovchiligi urushga aylanib ketgan.
Viloyat maʼmurlari qabilaviy nizoda 30 kishi halok bo‘lganini maʼlum qilgan. Jarohatlanib kasalxonaga yotqizilganlar soni esa 158 nafarga yetgan.
Mulk masalasidan tashqari diniy eʼtiqoddagi farq ham keskinlikni kuchaytirib yuborgan. Islomning ikki turli oqimi vakillari bo‘lgan qabila aʼzolari bir-birlarini shakkoklikda ayblab, qonli hujumlar uyushtirgan.
Xabarda aytilishicha, ikki qabila o‘rtasidagi nizo aslida 2007-yilda yuzaga kelgan. To‘rt yil davom etgan qonli qabilaviy urush 2011-yilda qabila oqsoqollari jirg‘asi (qabilaviy kengash) fatvosi bilan to‘xtatilgan.
2024-yilda qayta yuzaga kelgan keskinlik avvalgisidan ancha kengroq bo‘lgan. O‘nlab qishloqlar aholisi vahima tufayli hududlarini vaqtinchalik tashlab ketgan. Kurram tumani markazida otishmalar ro‘y bergan.
Hukumat Kurram tumani va uning markazi Parachinar shahrida to‘qnashuvlarni to‘xtatish uchun yo‘llarni yopib qo‘ygan. Buning oqibatida esa ko‘plab aholi punktlari va qishloqlarda oziq-ovqat va dori-darmonlar tanqisligi kuzatilgan.
Bosh vazir Shahbaz Sharifning avvalgi maʼmuriyati davrida xorijdagi pokistonliklar bo‘yicha federal vazir bo‘lib ishlagan mintaqa siyosatchisi Sajid Husayn Turining aytishicha, fuqarolik va xavfsizlik amaldorlari tezkor xatti-harakatlar amalga oshirib, qabila boshliqlarini uchrashtirishga va vaqtinchalik sulh imzolanishiga erishgan. Endilikda esa rasmiylar bu sulh kelishuvini mustahkamlash va barqarorlikni taʼminlashga diqqat-eʼtibor qaratgan.
“Bizning ustuvor vazifamiz birinchi navbatda o‘t ochishni to‘xtatish bo‘yicha vositachilik qilish edi. Bahsli yer va mulk masalasini esa oqsoqollar jirg‘asi hal qiladi”, deyilgan Pokiston rasmiylari xabarida.
Izoh (0)