Isroil aviatsiyasi 9-iyul kuni “Hizbulloh”ning havo-mudofaa inshootlariga zarba bergan. Bu haqda Yaqin Sharq nashrlari xabarlariga asoslanib, Al Jazeera maʼlum qildi.
Hujum Livanning Janta shaharchasi hududida sodir etilgan. Shaharcha tevaragidagi harbiy inshootlarga seriyali hujumlar tashkil etilgan.
Isroil harbiy rahbariyati hujum sodir etilganini tasdiqlagan. Havo zarbalari Livan poytaxtidan 79 kilometr uzoqlikdagi nuqtalarga yo‘naltirilgan.
Hujumni Livan rahbariyati jiddiy signal sifatida qabul qilgan. Chunki Isroil mamlakatning bu qadar ichki qismiga zarba bermagan.
Isroil harbiy-havo kuchlari parallel ravishda yana ikkita “Hizbulloh” bazasiga bombalar tashlagan. Livan janubidagi Baraxit shahridagi havo bazasi va Kfar Kila hududidagi qurol omboriga ketma-ket zarbalar berilgan.
Livan janubidagi Marjayun shahridan xabar bergan Al-Jazeera muxbiri yana beshta hududda Isroil hujumi kuzatilganini yozgan. Unga ko‘ra, yahudiy armiyasi artilleriyasi, dron va raketalari Beka vodiysidagi Yarun, Haddafa, Hula, Tulin va al-Nabi Shayf hududlariga talafotlar yetkazgan.
Livan tomoni hujumda halok bo‘lganlar va jarohatlanganlar haqida maʼlumot eʼlon qilmagan. Harbiy inshootlarga yetkazilgan zarar ko‘lami ham oshkor etilmagan.
Izoh (0)