Xitoy hukumati Ukraina hududiy yaxlitligi va suverenitetini to‘liq qo‘llab-quvvatlashi va hamkorlik qilishga tayyorligi borasida aniq ishoralar bor. Bu haqda Ukraina prezidenti Vladimir Zelenskiy bergan bayonotga asoslanib, “TimeTurk” nashri xabar berdi.
Manbada aytilishicha, Xitoyning Rossiya bilan aloqalari qay darajada bo‘lishida qatʼi nazar u hududiy o‘zgarishlarni maʼqullamaydi. Aynan shu omil Pekinning Moskva bilan aloqalarini cheklab turadi.
“Xitoy Ukrainaning hududiy yaxlitligi va suverenitetini qo‘llab-quvvatlashi haqida aniq signal bor. Xitoy maʼmuriy-hududiy o‘zgarishlarni qo‘llab-quvvatlamaydi. Urushlarni ham maʼqullamaydi”, degan Ukraina prezidenti Vladimir Zelenskiy.
Zelenskiyga ko‘ra, yaqinda Ukraina va Xitoy vakillari uchrashuvi o‘tkazilgan. Unda kechgan muzokaralarda Xitoy har qanday holatda ham Rossiyaga qurol yetkazib bermasligini tasdiqlagan.
“Xitoyga tashrif buyurgan tashqi ishlar vaziri Dmitriy Kuleba o‘z hamkasbi (Van Yi) bilan muzokaralar o‘tkazdi va uchrashuv yakunlari bo‘yicha menga hisobot berdi. Xitoy yetakchisi Si Szinpinning menga aytganlari ham tasdiqlandi. Xitoy Rossiyaga qurol yetkazib bermaydi”, degan Vladimir Zelenskiy videomurojaatida.
Oldinroq Ukraina tashqi ishlar vaziri Kuleba 24-iyul kuni Xitoyga uch kunlik rasmiy tashrif bilan borgan edi. Bu tashrif Ukraina rasmiysining Xitoyga so‘nggi ikki yildagi ilk tashrifi bo‘lgan.
Uchrashuvda Pekin barcha davlatlarning hududiy yaxlitligini hurmat qilishga chaqirgan. Biroq Ukraina hududlarida amaliyot olib borayotgan Rossiya haqida keskin siyosiy bayonot bermagan.
Xitoy rasmiylari Ukraina tomoniga Braziliya bilan hamkorlikda urushni siyosiy yo‘l bilan hal qilish uchun uch nuqtadan iborat deeskalatsiya formulasini taklif qilgan. Formula jang maydonini kengaytirmaslikni, janglarni kuchaytirmaslikni va urushda uchinchi tomonga suyanmaslikni talab etadi.
Izoh (0)