Хитой ҳукумати Украина ҳудудий яхлитлиги ва суверенитетини тўлиқ қўллаб-қувватлаши ва ҳамкорлик қилишга тайёрлиги борасида аниқ ишоралар бор. Бу ҳақда Украина президенти Владимир Зеленский берган баёнотга асосланиб, “TimeTurk” нашри хабар берди.
Манбада айтилишича, Хитойнинг Россия билан алоқалари қай даражада бўлишида қатъи назар у ҳудудий ўзгаришларни маъқулламайди. Айнан шу омил Пекиннинг Москва билан алоқаларини чеклаб туради.
“Хитой Украинанинг ҳудудий яхлитлиги ва суверенитетини қўллаб-қувватлаши ҳақида аниқ сигнал бор. Хитой маъмурий-ҳудудий ўзгаришларни қўллаб-қувватламайди. Урушларни ҳам маъқулламайди”, деган Украина президенти Владимир Зеленский.
Зеленскийга кўра, яқинда Украина ва Хитой вакиллари учрашуви ўтказилган. Унда кечган музокараларда Хитой ҳар қандай ҳолатда ҳам Россияга қурол етказиб бермаслигини тасдиқлаган.
“Хитойга ташриф буюрган ташқи ишлар вазири Дмитрий Кулеба ўз ҳамкасби (Ван Йи) билан музокаралар ўтказди ва учрашув якунлари бўйича менга ҳисобот берди. Хитой етакчиси Си Цзиньпиннинг менга айтганлари ҳам тасдиқланди. Хитой Россияга қурол етказиб бермайди”, деган Владимир Зеленский видеомурожаатида.
Олдинроқ Украина ташқи ишлар вазири Кулеба 24 июль куни Хитойга уч кунлик расмий ташриф билан борган эди. Бу ташриф Украина расмийсининг Хитойга сўнгги икки йилдаги илк ташрифи бўлган.
Учрашувда Пекин барча давлатларнинг ҳудудий яхлитлигини ҳурмат қилишга чақирган. Бироқ Украина ҳудудларида амалиёт олиб бораётган Россия ҳақида кескин сиёсий баёнот бермаган.
Хитой расмийлари Украина томонига Бразилия билан ҳамкорликда урушни сиёсий йўл билан ҳал қилиш учун уч нуқтадан иборат деескалация формуласини таклиф қилган. Формула жанг майдонини кенгайтирмасликни, жангларни кучайтирмасликни ва урушда учинчи томонга суянмасликни талаб этади.
Изоҳ (0)