AQSH prezidentligiga nomzod vitse-prezident Kamala Harris G‘azo sektoridagi azob-uqubatlarga jim qarab turmaslikka va’da berdi. Bu haqda u Isroil bosh vaziri Binyamin Netanyaxu bilan bo‘lib o‘tgan uchrashuvdan keyin aytdi.
Harris Isroil bosh vaziriga o‘zining jiddiy xavotirlarini bildirdi va unga o‘t ochishni to‘xtatish bo‘yicha muzokaralar vaqti kelganini aytdi.
“Isroil o‘zini himoya qilish huquqiga ega va buni qanday amalga oshirishi ahamiyatga molik. So‘nggi to‘qqiz oy ichida G‘azoda sodir bo‘lgan voqealar halokatli. Ko‘z oldimizda halok bo‘lgan bolalar va xavf-xatardan qochayotgan, ba’zan ikkinchi, uchinchi yoki to‘rtinchi marta ko‘chib ketishga majbur bo‘layotgan och-nahor odamlar tasviri gavdalanmoqda. Biz bu fojialardan yuz o‘gira olmaymiz. Azob-uqubatlar oldida gung bo‘la olmaymiz va men jim turmayman”, dedi u.
Harris Baydenning “qo‘llab-quvvatlashi” va Isroilga “qat’iy sodiqligi” haqidagi izohlarini takrorladi, ammo u urushni to‘xtatish masalasida qat’iy ekanini aytdi. U AQSHning o‘t ochishni to‘xtatish va garovga olinganlarni ozod qilish taklifini esga oldi.
“Urushni Isroil xavfsiz bo‘lgan, barcha garovga olinganlar ozod etilgan, G‘azodagi falastinliklarning azob-uqubatlari tugagan, falastinliklar o‘z erkinligi, qadr-qimmati va o‘z taqdirini o‘zi belgilash huquqidan foydalanishi mumkin bo‘lgan tarzda tugatish vaqti keldi”, deya xulosa qilgan u.
Izoh (0)