Zamonaviy aktyorlar faoliyati davomida o‘tgan asrda yashab o‘tgan va tarixda o‘chmas iz qoldirgan boshqa taniqli artistlar rollarini ijro etgan. Ularning ba’zilari xarakter va dunyoqarashiga yaqin bo‘lgan qahramonlarni gavdalantirish baxtiga muyassar bo‘lgan. Quyida ekranlarda boshqa aktyorlarni ijro etgan mashhur yulduzlarni yodga olamiz.
Kichik Robert Dauni
Kichik Robert Dauni “Chaplin” (1992) filmida afsonaviy aktyor, rejissyor va bastakor Charli Chaplin rolini ijro etgan.
Keyt Blanshett
Avstraliyalik aktrisa “Aviator” (2004) filmida yagona va betakror aktrisa — Ketrin Xepbyorn rolini o‘ynagan.
Keyt Bekinseyl
Martin Skorsezening “Aviator” (2004) filmida Keyt Bekinseyl o‘z davrining mashhur aktrisasi Ava Gardner rolini ijro etgan.
Mishel Uilyams
Mishel Uilyams “Merilin bilan hafta” (2011) filmidagi latofatli aktrisa Merilin Monroni gavdalantirdi. U, haqiqatan, aktrisaga tashqi jihatdan o‘xshar edi.
Jeyms Franko
Aktyor 2001-yilda “Jeyms Din” nomli biografik filmda 1950-yillarda Gollivudning eng mashhur erkak aktyorini ijro etdi.
Jennifer Lav Hyuitt
Hyuitt “Odri Hepbyorn tarixi” (2000) telefilmida taniqli aktrisa, “Tiffanidagi nonushta” nomli film orqali tanilgan Odri obrazini ijro etdi.
Kurt Rassell
Aktyor 1979-yilda “Elvis” filmida taniqli qo‘shiqchi va aktyor Elvis Presli rolini o‘ynadi.
Holli Berri
Aktrisa “Doroti Dendrij bilan tanishuv” (1999) filmida afsonaviy aktrisa Doroti rolini ijro etdi.
Kristen Styuart
Kristen Styuart 2019-yilda suratga olingan “Siberg” filmida aktrisa Jin Siberg rolida o‘zini sinab ko‘rgan.
Jim Kerri
Mashhur komik aktyor Jim Kerri 1999-yilda suratga olingan “Oydagi odam” filmida amerikalik Endi Kaufman rolini ijro etgan.
Ben Afflek
Afflek 2006-yilda Gollivudning mashhur Supermeni — aktyor Jorj Rivzni “Gollivudlend” filmida ijro etdi.
Madonna
“Evita” (1996) filmida xonanda Madonna argentinalik aktrisa va bo‘lajak birinchi xonim Eva Peron obrazini gavdalantirgan.
Jonni Depp
Aktyor “Ed Vud” (1994) filmida rejissyor va aktyor Eduard D. Vud rolini o‘ynagan.
Jeyson Skott Li
Aktyor 1993-yilda suratga olingan “Ajdaho: Bryus Li hikoyasi” biografik filmida jang san’ati ustasi va aktyor Bryus Li rolini ijro etgan.
Izoh (0)