Turk yulduzlari bilan shaxsan tanish bo‘lgan Gollivud aktyorlari

Gollivud olami va Turkiya kino sanoati hech qachon kesishmaydigan turfa dunyodek go‘yo. Har bir mamlakatning (Gollivud misolida AQSH nazarda tutilgan) o‘ziga xos kino tarixi va suratga olish uslubi mavjud. Bu ikki yo‘nalish tomoshabinlar e’tiborini tortish uchun hatto kuchli raqobatchilarga aylangan. Shunday bo‘lsa-da, ko‘plab amerikalik aktyorlar turk seriallar olamidagi yulduzlar bilan shaxsan tanish. Bugungi maqolada dizi olamini hurmat qiladigan Gollivud yulduzlarini sanab o‘tishga qaror qildik.

Jeyson Steytem va Kaan Urganchio‘g‘lu

Jeyson va Kaan “Fortuna operatsiyasi: G‘alaba san’ati” filmida birgalikda suratga tushgan. Unda turk aktyori bosh rolni ijro etgan va shu orqali sharqona aktyorlik maktabini yangi bosqichga olib chiqdi. Agar siz Gollivud va Turkiya filmlarini birdek qiziqib ko‘rsangiz, unda dam olish kunlari aynan ushbu filmni tomosha qilishingizni tavsiya etamiz.

Yeva Longoria va Hande Erchel

AQSH, Yevropa va boshqa ko‘plab mamlakatlar tiliga tarjima qilingan “Umidsiz uy bekalari” yulduzi Yeva Longoriya va “Qalbim eshigini qoq” seriali yulduzi Hande Erchel ikki hamkasb sifatida do‘st tutingan. 2023-yilda bo‘lib o‘tgan Kann kinofestivalidagi suratlar buni tasdiqlaydi. Darvoqe, 2024-yilning bahorida ikki iste’dodli aktrisa Kruazetdagi tadbirda ham ishtirok etgan.

Jonni Depp va Anjelina Joli — Chag‘atay Ulusoy

Gollivud tarixida o‘chmas iz qoldirgan mashhur aktyorlar Jonni Depp va Anjelina Joli turk aktyori Chag‘atay Ulusoyni tanishi mumkinligi haqida taxminlar bor. Chunki ular bir xil agentlik bilan hamkorlik qiladi. Ular bir-birini uchratgan bo‘lishi yoki hech bo‘lmasa iste’dodi va karyerasi haqida xabardor bo‘lishi tabiiy.

Kevin Speysi va Burak O‘zchivit

Aktyorlar bundan ikki yil avval — 2022 yilning dekabr oyida Qatarda uchrashishgan. Kevin Speysi “Kartali uy” va “Supermenning qaytishi” kabi filmlari orqali tanilgan. Burak, o‘z navbatida, mashhur Kevinning turkcha variantidir: ularning ikkisi o‘z yurtida katta hurmat va e’tirofga loyiq ko‘riladi.

Jiji Hadid va Kendall Jenner — Melissa Asli Pamuk

Pamuk xonim Messika nomli fransuz zargarlik brendining Turkiyadagi ambassadori. Mazkur brendni supermodel dugonalar —Jiji Hadid va Kendal Jenner taqdim etgan. Shu sababli, Messika tomonidan tashkil etilgan ijtimoiy tadbirlardan birida Gollivud va Turkiya yulduzlari yaqindan tanishgan bo‘lishi mumkin.

Antonio Banderas va Kerem Bursin

“Qalbim eshigini qoq”, “Quyoshni kutish” kabi seriallar bilan mashhurlikka erishgan aktyor Kerem Bursin Ispaniyaga navbatdagi safari paytida Gollivudning serqirra yulduzi Antonio Banderas bilan tanishgan. Ehtimol, ikki iste’dod bir loyihada suratga tushish g‘oyasini ilgari surar?

Anjelina Joli — Haluk Bilginer

“Shaxsiyat” serialidagi roli uchun “Eng yaxshi inglizzabon bo‘lmagan aktyor” nominatsiyasini qo‘lga kiritgan Haluk Bilginer Anjelina Joli bilan “Mariya” filmida birga suratga tushgan.

Josh Hyuston — Mert Ramazon Demir

“Qo‘rg‘on sirlari” filmidagi kelishgan Ferit ismli qahramon “Tor: Sevgi va chaqmoq” filmida suratga tushgan Josh Hyuston bilan yaqindan tanish. Ko‘pchilik bu ikki yulduzning tashqi tomondan juda o‘xshash ekanligini ham qayd etgan. Ayniqsa bunday o‘xshashlik Yves Saint Laurent brendi tomonidan tashkil etilgan yulduzli kechada yaqqol ko‘zga tashlandi.