O‘zbekistonda bank va bir qator soha vakillari eng ko‘p, taʼlim hamda sog‘liqni saqlash xodimlari eng kam o‘rtacha oylik olmoqda. Bu haqda Statistika agentligi sharhida maʼlumot berildi.
Joriy yilning birinchi yarmida O‘zbekistonda o‘rtacha oylik nominal hisoblangan ish haqi 5 million 92 ming so‘mni tashkil etdi. Eng yuqori o‘rtacha ish haqi Toshkent shahri (8,4 million so‘m) va Navoiy (6,6 million so‘m) viloyatida qayd etildi.
Yarim yil davomida mamlakatda o‘rtacha oylik ish haqining eng baland ko‘rsatkichi — bank, sug‘urta, lizing, kredit va vositachilik faoliyati sohasiga to‘g‘ri kelib, 14,4 million so‘mni tashkil etdi. Axborot va aloqa sohasi vakillariga o‘rtacha 12,4 million so‘m, tashish va saqlashga 7,7 million so‘m, sanoat sohasida 6,2 million so‘m to‘langan.
Taʼlim (3,5 million so‘m), sog‘liqni saqlash va ijtimoiy xizmatlar ko‘rsatish (3,3 million so‘m) sohalari o‘rtacha oylik ish haqi miqdori bo‘yicha boshqa sohalardan quyi pog‘onalarda qolmoqda.
O‘rta darajadan yuqori ish haqi oluvchilar
Agentlik sharhida iqtisodiy faoliyat turlari kesimida ayrim sohalardagi o‘rtacha oylik ish haqlari tahlil qilingan. Xususan, kompyuter dasturlashtirish, maslahat berish va boshqa yordamchi xizmatlari xodimlarining o‘rtacha oylik ish haqi eng yuqori — 17,6 million so‘mni tashkil etgan.
Majburiy ijtimoiy sug‘urtalashdan tashqari, qayta sug‘urtalash va nafaqa jamg‘armalari faoliyatida o‘rtacha oylik ish haqi 16,4 million so‘m bo‘lgan.
Moliyaviy xizmatlar ko‘rsatish va sug‘urtalash bo‘yicha yordamchi faoliyati xodimlari o‘rtacha 16 million so‘m oylik olgan. Shu bilan birga, quyidagi yo‘nalishlarda ish haqi o‘rtacha oylik miqdoridan yuqori bo‘lgan:
- Axborot xizmati ko‘rsatish sohasi — 14,4 million so‘m;
- Sug‘urtalash va nafaqa taʼminotidan tashqari moliyaviy xizmatlar —14,2 million so‘m;
- Aloqa sohasi — 10,6 million so‘m;
- Tog‘-kon sanoati va ochiq konlarni ishlash — 9,1 million so‘m;
- Ombor xo‘jaligi va yordamchi transport faoliyati —8,8 million so‘m;
- Oliy taʼlim — 8,1 million so‘m;
- Elektr, gaz, bug‘ bilan taʼminlash va havoni konditsiyalash —7 million so‘m.
Yarim yil davomida bank, sug‘urta, lizing, kredit va vositachilik faoliyati iqtisodiy faoliyat turi bo‘yicha o‘rtacha oylik ish haqining eng yuqori ko‘rsatkichi Toshkent shahrida qayd etildi — 17,7 million so‘m. Shuningdek, Andijon (13,3 million so‘m) va Navoiy (12,6 million so‘m) viloyatlarida mazkur sohalardagi o‘rtachadan yuqori ish haqi to‘langan.
Savdo sohasi bo‘yicha o‘rtacha ish haqining eng yuqori ko‘rsatkichi avtomobil, mototsikllar ulgurji va chakana savdosi, ularni taʼmirlash yo‘nalishida (6,9 million so‘m), eng past daraja avtomobil va mototsikllar savdosidan tashqari chakana savdoda (5, 5 million so‘m) kuzatildi.
O‘rtacha ko‘rsatkichdan kam ish haqi oluvchilar
Yarim yil davomida taʼlim sohasida o‘rtacha oylik ish haqi 3,5 million so‘mni tashkil etgan.
Sohaning asosiy tarmoqlari bo‘yicha o‘rtacha oylik ish haqining eng yuqori ko‘rsatkichi oliy taʼlimda (8,1 million so‘m), eng past raqamlar maktabgacha taʼlimda (1,8 million so‘m) qayd etilgan.
Umumiy o‘rta taʼlim sohasi xodimlari o‘rtacha oylik ish haqini 3,5 million so‘mdan, texnik va professional taʼlim vakillari 3,6 million so‘mdan olgan.
Taʼlim sohasi bo‘yicha o‘rtacha oylik ish haqining eng yuqori ko‘rsatkichi Toshkent shahri (5,7 million so‘m), Namangan (3,5 million so‘m) hamda Toshkent viloyatlarida (3,4 million so‘m) kuzatilgan. Sohadagi eng past darajadagi o‘rtacha oylik ish haqi Qashqadaryoda — 2,9 million so‘mni tashkil etgan.
Yanvar–iyun oylarida sog‘liqni saqlash va ijtimoiy xizmatlar ko‘rsatish sohasida o‘rtacha oylik ish haqi 3,3 million so‘mni bo‘lgan.
Sohada faoliyat turi bo‘yicha o‘rtacha oylik ish haqining eng yuqori ko‘rsatkichi Toshkent shahri (4,1 million so‘m), Xorazm viloyati (3,6 million so‘m) hamda Qoraqalpog‘istonda (3,6 million so‘m) kuzatilgan. Eng past darajadagi o‘rtacha oylik ish haqi esa Qashqadaryoda to‘langan — 2,6 million so‘m.
Shu bilan birga, yashash va ovqatlanish xizmatlari sohasida o‘rtacha oylik ish haqi 4,6 million so‘mni tashkil etgan. Mazkur sohada faoliyat turi bo‘yicha o‘rtacha oylik ish haqining eng yuqori ko‘rsatkichi Samarqand viloyatida (5,2 million so‘m), eng past darajasi Sirdaryo viloyatida (1,5 million so‘m) bo‘lgan.
Yanvar—iyun oylarisa san’at, ko‘ngil ochish va dam olish sohasida o‘rtacha oylik ish haqi 4,1 million so‘mni tashkil etdi. Sohada faoliyat turi bo‘yicha eng yuqori ko‘rsatkich Toshkent viloyatida (5,9 million so‘m), eng past daraja Sirdaryoda (3 million so‘m) kuzatildi.
Izoh (0)