O‘zbekistondan Rossiyaga mehnat migrantlari oqimi kamayishi mumkin. Bu haqda O‘zbekiston Tashqi mehnat migratsiyasi agentligi bo‘lim boshlig‘i Alisher Ro‘ziyev ma’lum qildi.
Uning ta’kidlashicha, hozir O‘zbekistonda qurilish sohasi faol rivojlanmoqda, ba’zi obyektlardagi ish haqi esa Rossiyadagi mehnat haqi bilan raqobatlasha oladi.
“Bugungi kunda O‘zbekistonda qurilish sohasida keskin o‘sish bo‘lmoqda va tabiiy ravishda, bizdagi ish haqi Rossiyadagi ba’zi obyektlarniki bilan tenglashib qoldi. Shu sababli ushbu vaziyatda Rossiyaga jo‘nab ketayotgan fuqarolarimiz oqimining pasayish tendensiyasi kuzatilishi mumkin”, — dedi Alisher Ro‘ziyev.
Tashqi mehnat migratsiyasi agentligi bo‘lim boshlig‘ining aytishicha, O‘zbekistondagi ba’zi yirik qurilish obyektlarida qurilish ixtisosliklari bo‘lgan ishchilar oyiga 500−600 dollar ishlab topmoqda.
“Shunga ko‘ra, bunday ish haqi uchun Rossiyaga borish endi manfaatli bo‘lmay qoldi”, — deya qo‘shimcha qilgan agentlik vakili.
Shuningdek, uning bildirishicha, O‘zbekiston Tashqi mehnat migratsiyasi agentligi so‘nggi ikki yilda fuqarolarni xorijda ishga joylashtirish geografiyasini sezilarli darajada kengaytirdi. Bu Yevropada ishchi kuchiga bo‘lgan talab oshgani hisobiga ham bo‘lgan.
Iyun oyi boshlarida O‘zekiston prezidenti matbuot kotibi Sherzod Asadov Rossiyadagi o‘zbekistonlik mehnat migrantlari soni 4-6 milliondan 1 million kishiga kamayganini ma’lum qilgandi. Rossiya prezidenti Vladimir Putinning O‘zbekistonga davlat tashrifida ikki davlat rahbari mehnat muhojirlarining bugungi kundagi umumiy soni bo‘yicha shunday ma’lumotni aytgan.
10-may kuni Shavkat Mirziyoyev raisligidagi videoselektor yig‘ilishida 2024-yilning yanvar—mart oylarida mehnat migratsiyasidan 58 ming nafar, aprelda 57 ming nafar fuqaro qaytib kelgani ma’lum qilingandi. Yil oxirigacha yana 250-300 ming kishi qaytishi prognoz qilinmoqda. Qaytgan fuqarolarni ishga joylashtirish yuzasidan topshiriqlar berilgan.
Izoh (0)