“Yoshlarga hamrohlik dasturi”ga kiritilganlar o‘qishni tamomlagach, davlat tashkilotiga tanlovsiz qabul qilinadi — Ijtimoiy himoya milliy agentligi

Yetim va ota-ona qaramog‘isiz toifadagi 14 yoshdan 23 yoshgacha bo‘lgan bolalar uchun “Yoshlarga hamrohlik dasturi” joriy qilinmoqda. Bu haqda Toshkent shahrida bo‘lib o‘tgan “Bandlik va ijtimoiy himoyani uyg‘unlashtirish orqali O‘zbekistonda ijtimoiy adolat tamoyillarini mustahkamlash” mavzusida xalqaro konferensiyada ma’lum qilindi.

Ijtimoiy himoya milliy agentligi direktori Mansurbek Olloyorovning aytishicha, “Yoshlarga hamrohlik dasturi” doirasida:

• har bir bola uchun “individual reja” asosida mahallalarda ijtimoiy xodimlar biriktiriladi;
• oliy ta’lim, kasb-hunarga tayyorlash, uy-joy ijarasi hamda davolanish xarajatlari davlat tomonidan qoplab beriladi;
• ta’limni tamomlagan yoshlar davlat fuqarolik xizmatiga tanlovsiz qabul qilinadi.

Qo‘shimcha qilinishicha, “Ijtimoiy sug‘urta to‘g‘risida”gi qonun loyihasi ishlab chiqilib, tez orada qabul qilish rejalashtirilgan.