Ўзбекистонда банк ва бир қатор соҳа вакиллари энг кўп, таълим ҳамда соғлиқни сақлаш ходимлари энг кам ўртача ойлик олмоқда. Бу ҳақда Статистика агентлиги шарҳида маълумот берилди.
Жорий йилнинг биринчи ярмида Ўзбекистонда ўртача ойлик номинал ҳисобланган иш ҳақи 5 миллион 92 минг сўмни ташкил этди. Энг юқори ўртача иш ҳақи Тошкент шаҳри (8,4 миллион сўм) ва Навоий (6,6 миллион сўм) вилоятида қайд этилди.
Ярим йил давомида мамлакатда ўртача ойлик иш ҳақининг энг баланд кўрсаткичи — банк, суғурта, лизинг, кредит ва воситачилик фаолияти соҳасига тўғри келиб, 14,4 миллион сўмни ташкил этди. Ахборот ва алоқа соҳаси вакилларига ўртача 12,4 миллион сўм, ташиш ва сақлашга 7,7 миллион сўм, саноат соҳасида 6,2 миллион сўм тўланган.
Таълим (3,5 миллион сўм), соғлиқни сақлаш ва ижтимоий хизматлар кўрсатиш (3,3 миллион сўм) соҳалари ўртача ойлик иш ҳақи миқдори бўйича бошқа соҳалардан қуйи поғоналарда қолмоқда.
Ўрта даражадан юқори иш ҳақи олувчилар
Агентлик шарҳида иқтисодий фаолият турлари кесимида айрим соҳалардаги ўртача ойлик иш ҳақлари таҳлил қилинган. Хусусан, компьютер дастурлаштириш, маслаҳат бериш ва бошқа ёрдамчи хизматлари ходимларининг ўртача ойлик иш ҳақи энг юқори — 17,6 миллион сўмни ташкил этган.
Мажбурий ижтимоий суғурталашдан ташқари, қайта суғурталаш ва нафақа жамғармалари фаолиятида ўртача ойлик иш ҳақи 16,4 миллион сўм бўлган.
Молиявий хизматлар кўрсатиш ва суғурталаш бўйича ёрдамчи фаолияти ходимлари ўртача 16 миллион сўм ойлик олган. Шу билан бирга, қуйидаги йўналишларда иш ҳақи ўртача ойлик миқдоридан юқори бўлган:
- Ахборот хизмати кўрсатиш соҳаси — 14,4 миллион сўм;
- Суғурталаш ва нафақа таъминотидан ташқари молиявий хизматлар —14,2 миллион сўм;
- Алоқа соҳаси — 10,6 миллион сўм;
- Тоғ-кон саноати ва очиқ конларни ишлаш — 9,1 миллион сўм;
- Омбор хўжалиги ва ёрдамчи транспорт фаолияти —8,8 миллион сўм;
- Олий таълим — 8,1 миллион сўм;
- Электр, газ, буғ билан таъминлаш ва ҳавони кондициялаш —7 миллион сўм.
Ярим йил давомида банк, суғурта, лизинг, кредит ва воситачилик фаолияти иқтисодий фаолият тури бўйича ўртача ойлик иш ҳақининг энг юқори кўрсаткичи Тошкент шаҳрида қайд этилди — 17,7 миллион сўм. Шунингдек, Андижон (13,3 миллион сўм) ва Навоий (12,6 миллион сўм) вилоятларида мазкур соҳалардаги ўртачадан юқори иш ҳақи тўланган.
Савдо соҳаси бўйича ўртача иш ҳақининг энг юқори кўрсаткичи автомобиль, мототцикллар улгуржи ва чакана савдоси, уларни таъмирлаш йўналишида (6,9 миллион сўм), энг паст даража автомобиль ва мототцикллар савдосидан ташқари чакана савдода (5, 5 миллион сўм) кузатилди.
Ўртача кўрсаткичдан кам иш ҳақи олувчилар
Ярим йил давомида таълим соҳасида ўртача ойлик иш ҳақи 3,5 миллион сўмни ташкил этган.
Соҳанинг асосий тармоқлари бўйича ўртача ойлик иш ҳақининг энг юқори кўрсаткичи олий таълимда (8,1 миллион сўм), энг паст рақамлар мактабгача таълимда (1,8 миллион сўм) қайд этилган.
Умумий ўрта таълим соҳаси ходимлари ўртача ойлик иш ҳақини 3,5 миллион сўмдан, техник ва профессионал таълим вакиллари 3,6 миллион сўмдан олган.
Таълим соҳаси бўйича ўртача ойлик иш ҳақининг энг юқори кўрсаткичи Тошкент шаҳри (5,7 миллион сўм), Наманган (3,5 миллион сўм) ҳамда Тошкент вилоятларида (3,4 миллион сўм) кузатилган. Соҳадаги энг паст даражадаги ўртача ойлик иш ҳақи Қашқадарёда — 2,9 миллион сўмни ташкил этган.
Январь–июнь ойларида соғлиқни сақлаш ва ижтимоий хизматлар кўрсатиш соҳасида ўртача ойлик иш ҳақи 3,3 миллион сўмни бўлган.
Соҳада фаолият тури бўйича ўртача ойлик иш ҳақининг энг юқори кўрсаткичи Тошкент шаҳри (4,1 миллион сўм), Хоразм вилояти (3,6 миллион сўм) ҳамда Қорақалпоғистонда (3,6 миллион сўм) кузатилган. Энг паст даражадаги ўртача ойлик иш ҳақи эса Қашқадарёда тўланган — 2,6 миллион сўм.
Шу билан бирга, яшаш ва овқатланиш хизматлари соҳасида ўртача ойлик иш ҳақи 4,6 миллион сўмни ташкил этган. Мазкур соҳада фаолият тури бўйича ўртача ойлик иш ҳақининг энг юқори кўрсаткичи Самарқанд вилоятида (5,2 миллион сўм), энг паст даражаси Сирдарё вилоятида (1,5 миллион сўм) бўлган.
Январь—июнь ойлариса санъат, кўнгил очиш ва дам олиш соҳасида ўртача ойлик иш ҳақи 4,1 миллион сўмни ташкил этди. Соҳада фаолият тури бўйича энг юқори кўрсаткич Тошкент вилоятида (5,9 миллион сўм), энг паст даража Сирдарёда (3 миллион сўм) кузатилди.
Изоҳ (0)