Iqtisodiy zonaga transformator, “Zamonaviy kasblar”ga ajratilgan millionlar, bir yildan buyon Navoiyga yetib bormagan yo‘ltanlamas — Senat hududlardagi o‘rganishlar natijalarini e’lon qildi

Oliy Majlis Senati a’zolari tomonidan o‘tkazilgan o‘rganishlar chog‘ida aniqlangan kamchiliklar va yillar davomida paysalga solib kelinayotgan masalalar yuzasidan ma’lumotlar taqdim etdi.

Jumladan, “Jizzax” maxsus iqtisodiy zonasida har birining quvvati 40 MVt bo‘lgan ikki transformatorli podstansiya, shuningdek, kanalizatsiya tarmog‘i qurilish ishlari paysalga solib kelinayotgani aniqlangan. Shundan so‘ng hukumatning farmoyishi qabul qilinib, unda “Jizzax” MIZ hududida 40 mVt 2 ta transformatorli podstansiya, shuningdek, 1 ta oqova suv nasos stansiyasi, 5 km tashqi bosimli hamda 2,4 km ichki oqova suv tarmog‘i qurilishi belgilangan.

Yana bir holatda Qashqadaryo viloyatidagi Shahrisabz tumanidagi “Barkamol avlod” bolalar maktabida “Zamonaviy kasblar” laboratoriyasini tashkil etish, ftiziatriya va pulmonologiya tizimidagi sihatgohlarni zamonaviy reabilitatsiya, davolash va laboratoriya uskunalari bilan jihozlash zarur ekanligi aniqlangan. Muammoni bartaraf etish uchun viloyat hokimligi 181 million so‘m ajratgan.

Bir yil avval Navoiy viloyatdagi tuman (shahar) tibbiyot birlashmalarining kardiologiya bo‘limlariga 11 ta EKG, 11 ta ExoKG, 11 ta Xolter-monitor, 11 ta defibrillyator apparatlari yetkazib berish belgilangan. Shuningdek, tez tibbiy yordam tizimi uchun 2 ta yo‘ltanlamas avtotransportni yetkazib berish ko‘zda tutilgan. Lekin haligacha bu ishlar bajarilmagan.

Senat axborot xizmatining “Daryo”ga ma’lum qilishicha, ushbu masala nazoratga olingan bo‘lib, holat yuzasidan qo‘shimcha axborot beriladi.